सर्लाहीको बागमती नगरपालिका –८, गाजल चोकमा बिहीबार बिहान भएको मोटरसाइकल दुर्घटनामा एक जनाको मृत्यु भएको छ ।

दुर्घटनामा एकै परिवारका तीन जना घाइते भएका छन् । गाजली चोकस्थित चौबाटोमा भएको दुर्घटनामा बागमती नगरपालिका –८, सोल्टीका ५० वर्षीय गणेशकुमार कार्कीको मृत्यु भएको हो ।

कार्कीलाई उपचारका लागि सरस्वती अस्पताल हरिवन ल्याउँदा चिकित्सकले मृत घोषणा गरेको इलाका प्रहरी कार्यालय बरहथवाले जनाएको छ । राजघाटबाट सोल्टीतर्फ आउँदैगरेको कार्कीले चलाएको बा ३० प ९४०७ नम्वरको मोटरसाइकल र विपरीत दिशाबाट जाँदैगरेको ना ५९ प ५१७७ नम्वरको मोटरसाइकल आपसमा ठोक्किएर दुर्घटना भएको थियो ।

दुर्घटनामा ना ५९ प ५१७७ नम्वरको मोटरसाइकलमा सवार एकै परिवारका तीन जना घाइते भएका छन् । मोटरसाइकल चालक हरिवन नगरपालिका–१, बस्ने ३२ वर्षीय मुकेशकुमार साह, उहाँकी श्रीमती २६ वर्षीया शान्ताकुमारी साह र छोरी तीन वर्षीया प्रियाकुमारी घाइते भएका हुन् ।

तीनै जनाको नमूना अस्पताल हरिवनमा उपचार भइरहेको छ । घाइतेमध्ये श्रीमान–श्रीमातीको अवस्था खतरामुक्त भए पनि छोरीको अवस्था भने गम्भीर रहेको बरहथवाका प्रहरी नायब उपरीक्षक (डीएसपी) लीलाराज लामिछानेले जानकारी दिनुभयो ।

मृतक कार्कीको शव पोष्टमार्टमका लागि प्रादेशिक अस्पताल मलङ्गवा पठाइ दुर्घटनाको थप अनुसन्धान भइरहेको प्रहरीले जनाएको छ ।