भन्सार छलि गरि ल्याएको १५ बोरा घडी लगायतका सामानसहित प्रहरीले एक जनालाई पक्राउ गरेको छ।

बिहीबार बिहान काठमाडौंको चन्द्रागिरी नगरपालिका–२ सुरुङमार्गस्थित चेक प्वाइन्टमा वीरगञ्जदेखि काठमाडौँ आउँदै गरेको बाप्र ०३–००१ ख ३४९३ यात्रुवाहक बसमा सो सामान फेला परेको हो।

प्रहरी प्रभाग नागढुङ्गाबाट खटिएको प्रहरी टोलीले चेकजाँच गर्ने क्रममा उक्त बसको डिक्कीमा बिल बीजक बिनाको १५ बोरा विभिन्न कम्पनीको घडी, ४ कार्टुन अमूल चीज, ३ कार्टुन अमूल क्रिम र मिल्किस्ट बिस्कुट १ कार्टुन फेला पारी नियन्त्रणमा लिइएको प्रहरीले जनाएको छ।

पक्राउ परेका व्यक्ति र बरामद सामान आवश्यक कारबाहीको लागि त्रिभुवन अन्तर्राष्ट्रिय विमानस्थल भन्सार कार्यालय, गौचर पठाइएको छ।