मोरङको पथरीशनिश्चरेमा शनिबार राति एउटा कारको ठक्करबाट एक पैदलयात्री पुरुषको मृत्यु भएको छ।

पूर्व-लोकमार्ग अन्तर्गत पथरीशनिश्चरे नगरपालिका-२ जय चोकमा प्रदेश १-०१-००१ च ७९६४ नम्बरको कारले राति ९ बजेतिर ठक्कर दिँदा दुर्घटना भएको हो। दुर्घटनामा पथरीशनिश्चरे-१० का ४३ वर्षीय सन्तोष लिम्बूको मृत्यु भएको इलाका प्रहरी कार्यालय पथरीका डीएसपी गणेश श्रेष्ठले जानकारी दिए।

डीएसपी श्रेष्ठका अनुसार पश्चिमबाट पूर्वतर्फ गइरहेको कारको ठक्करबाट लिम्बू गम्भीर घाइते भएका थिए। उपचारका लागि उर्लाबारीको मदन भण्डारी अस्पताल र ट्रमा सेन्टर पुर्याउँदा चिकित्सकले लिम्बूलाई मृत घोषित गरेका थिए।

डीएसपी श्रेष्ठका अनुसार कार र चालक झापाको दमक नगरपालिका-५ का ४२ वर्षीय घनश्याम रिजाललाई नियन्त्रणमा लिएर घटनाको अनुसन्धान सुरु गरिएको छ। प्रारम्भिक अनुसन्धानबाट कारको तीव्र गतिका कारण दुर्घटना भएको देखिएको छ।