कञ्चनपुरमा बसले ठक्कर दिँदा एक महिलाको मृत्यु भएको छ। बसको ठक्करबाट बैतडीकी भागरथी अवस्थीको मृत्यु भएको हो।

बैतडीको सिगास गाउँपालिका–९ गन्सुर घर भएकी ३९ बर्षीया अवस्थीलाई आइतबार पूर्वपश्चिम राजमार्ग अन्तर्गत कञ्चनपुरको शुक्लाफाँटा नगरपालिका–११कलुवापुरमा बसले ठक्कर दिएको थियो।

केही दिन पहिलामात्रै भतिजीको बिहेमा सहभागी हुन आफ्ना श्रीमान शिवराज अवस्थीसहित भागरथी बैतडीबाट कञ्चनपुर गएकी थिइन् । आइतबार बैतडी आउने क्रममा उनका श्रीमान शिवराजले चलाएको मोटरसाइकललाई बसले ठक्कर दिएपछि उनी गम्भीर घाइते भएकी थिइन्।

भागरथीको उपचारकै क्रममा धनगढी स्थित मायामेट्रो हस्पिटलमा मृत्यु भएको उनका आफन्त मुरलीधर अवस्थीले बताए । म १ख ९३५ नम्बरको बसले सुदुरपश्चिम प्रदेश ०१–००९ प १२०७ नम्बरको मोटरसाईकललाई ठक्कर दिएको थियो । बसले ठक्कर दिएपछि मृतकका श्रीमान् शिवराज अवस्थी र १३ बर्षीय छोरा बालकृष्ण अवस्थी घाइते भएका छन्।
घटनापछि बस र बसका चालक ३२ बर्षीय नरेन्द्रसिंह भण्डारीलाई प्रहरीले नियन्त्रणमा लिएको छ।