हेटौंडा /  हेटौंडा बजार क्षेत्रमा सवारीको ठक्करबाट एक जना मृत्यु भएको छ । पूर्वपश्चिम राजमार्ग अन्तर्गत हेटौंडा उपमहानगरपालिका वडा नं.४ स्थित नारायणी पेट्रोलपम्म अगाडि अन्दाजी ४५ वर्षीय पुरुषको मृत्यु भएको हो ।

जिल्ला प्रहरी कार्यालय मकवानपुरका अनुसार शनिबार साँझ ८ बजेर १० मिनेटमा अपरिचित सवारीले ठक्कर दिँदा ती पुरुष घाइते भएका थिए । उनको तत्काल उद्धार गरी हेटौंडा अस्पतालमा लगिएकोमा उपचारको क्रममा सोही दिन साँझ ८ बजेर २५ मिनेटमा मृत्यु भएको प्रहरीले जनाएको छ ।

ती मृतक पुरुषको पहिचान समेत खुलेको छैन । उनको शव हेटौंडा अस्पतालमा राखिएको छ ।

हेटौंडा बजार क्षेत्रको मुख्य सडकमै सवारीको ठक्करबाट पैदलयात्रुको मृत्यु हुँदा प्रहरीले कुन, कस्तो खालको सवारीले ठक्कर दिएको हो ? भन्ने पत्ता लगाउन सकेको छैन ।

बजारको मुख्यमुख्य क्षेत्रमा सिसिटिभी जडान गरिएको छ । सिसिटिभीमा कैद भएको भिडियो हेर्दा समेत प्रहरीले ठक्कर दिने सवारी पत्ता लगाउन सकेको छैन ।

जिल्ला प्रहरी कार्यालय मकवानपुरका प्रवक्ता एवम् प्रहरी नायब उपरीक्षक लक्ष्मी भण्डारी सिसिटिभीको भिडियो हेर्दा कुन सवारीले ठक्कर दियो भन्ने बारेमा पुष्टि नभएको बताउँछन् । दुर्घटना गराउने सवारीको पहिचान र खोजी कार्य भइरहेको उनले बताए ।प्रहर खबरबाट