मकवानपुरको इन्द्रसरोवर गाउँपालिका–२ स्थित सिमखोलामा आएको बाढीमा बेपत्ता भएका स्कुटी चालक खोजीको क्रममा बिहीबार (आज) बिहान स्कुटर चालक सर्लाहीका महेश कुमार कार्की मृत अवस्थामा फेला परेका हुन् ।

सोमबार दिउँसो करिब ३ बजे अचानक आएको बाढीले बा.प्रदेश–०२–०३२ प ८०५४ नम्बरको स्कुटीसहित चालकलाई बगाएको थियो । घटनालगत्तै नेपाल प्रहरी, नेपाली सेना र सशस्त्र प्रहरी बलको संयुक्त टोलीले खोजी गरेको थियो ।

खोजीको क्रममा मंगलबार स्कुटी घटनास्थलबाट करिब १ सय मिटर तल खोलाको दहमा फेला परेको थियो । त्यसपछि निरन्तर खोजी जारी राखिएकोमा चालकलाई पनि घटनास्थल नजिकै खोलामा करिब १ मिटर जति लेदो तथा ढुंगाले पुरिएको अवस्थामा मृत फेला पारिएको प्रहरीले जनाएको छ ।

बाढीले बगाएर ल्याएको लेदो, ढुंगा तथा तीव्र बहावका कारण खोजी कार्य निकै चुनौतीपूर्ण बनेको थियो । सुरक्षाकर्मीले स्थानीय बासिन्दाको सहयोगमा निरन्तर खोजी अभियान सञ्चालन गरेपछि शव फेला परेको हो ।

प्रहरीले मृतकको शव आवश्यक कानुनी प्रक्रिया पूरा गरी पोस्टमार्टमका लागि पठाउने तयारी गरेको जनाएको छ । घटनाबारे थप अनुसन्धान भइरहेको प्रहरीले जानकारी दिएको छ ।