मकवानपुरको थाहा नगरपालिकाले नगरभित्रका सबै विद्यालय आइतबारसमेत सञ्चालन गर्ने निर्णय गरेको छ।

थाहा नगर शिक्षा समितिको सोमबार (आज) बसेको बैठकले शैक्षिक गुणस्तर सुधार, विद्यार्थीको सिकाइ उपलब्धि अभिवृद्धि तथा नियमित पठनपाठनलाई थप प्रभावकारी बनाउने उद्देश्यसहित आइतबार पनि विद्यालय सञ्चालन गर्ने निर्णय गरेको हो।

नगरपालिकाका अनुसार सार्वजनिक बिदा, विभिन्न कार्यक्रम तथा अन्य कारणले शैक्षिक गतिविधि प्रभावित हुँदै आएको अवस्थालाई मध्यनजर गर्दै अतिरिक्त पठनपाठन आवश्यक ठहर गरिएको हो।

सोहीअनुसार नगरभित्र सञ्चालित सामुदायिक तथा संस्थागत सबै विद्यालयमा आइतबार नियमित कक्षा सञ्चालन गरिनेछ। शिक्षा समितिले निर्णयको प्रभावकारी कार्यान्वयनका लागि विद्यालय व्यवस्थापन समिति, प्रधानाध्यापक, शिक्षक, अभिभावक तथा विद्यार्थी सबै पक्षलाई आवश्यक समन्वय र सहयोग गर्न आग्रह गरेको छ।

नगरपालिकाको यो निर्णयले विद्यार्थीको सिकाइ समय वृद्धि हुनुका साथै शैक्षिक उपलब्धि र पठनपाठनको गुणस्तरमा सकारात्मक प्रभाव पर्ने बताएको छ।