हेटौंडा / मकवानपुरमा बस दुर्घटना हुँदा ३५ जना घाइते भएका छन् । मकवानपुरको मनहरी गाउँपालिका–७ समिडाँडा स्थित पूर्व पश्चिम राजमार्गमा काठमाण्डौबाट महोत्तरीको लागि आउँदै गरेको बस सडकबाट १० मिटर तल खस्दा ३५ जना घाइते भएका हुन् ।

प्रदेश २–०३–००१ ख ३६२९ नम्बरकोे बस बुधबार (आज) बिहान ४ बजेतिरको समयमा आफै अनियन्त्रित भई सडकबाट १० मिटर तल दाहिने साईडमा पल्टी दुर्घटना भएको मकवानपुर प्रहरी प्रवक्ता प्रहरी नायव उपरीक्षक (डिएसपी) श्यामु अर्यालले बताए ।

उनका अनुसार घाइतेहरुलाई उपचारको लागि चितवन स्थित पूरानो मेडिकल कलेज भरतपुर पठाइएको छ। घाइतेहुनेमध्ये १३ जनाको अवस्था मध्यम रहेको छ भने बाँकी २२ जना सामान्य घाइते भएका छन्। बस चालक महोतरी पिपरा गाउँपालिका–२ बस्ने अन्दाजी ३७ बर्षको जय किशोर कापरलाई प्रहरीले निणन्त्रणमा लिएको बताइएको छ ।