हेटौंडा /  मकवानपुरको बागमती गाउँपालिकामा एक वेवारिसे महिलाको शव फेला परेको छ।

प्रहरीका अनुसार आज (सोमबार) साँझ करिज ५ बजे बागमती गाउँपालिका वडा नंं.४ स्थित चौरादोभानको बागमती खोलाको बीच बगरमा एक महिलाको लाश घोप्टो अवस्थामा फेला परेको हो । मृतक महिलाको उमेर अन्दाजी २४/२५ वर्षको रहेको र उनको पहिचान खुल्न नसकेको मकवानपुर प्रहरी प्रवक्ता डिएसपी लक्ष्मी भण्डारीले जानकारी दिए।

घटनाबारे जानकारी पाउनासाथ इलाका प्रहरी कार्यालय फापरबारीबाट प्रहरी निरीक्षकको नेतृत्वमा एक टोली घटनास्थल पुगेको थियो। प्रहरीले घटनास्थलमा लाश जाँच मुचुल्का गरी थप अनुसन्धानका लागि शवलाई हेटौंडा अस्पताल पठाएको छ।

घटना बारे प्रहरीले थप अनुसन्धान गरिरहेको जनाएको छ।