हेटौंडा /  हेटौंडा उपमहानगरपालिका वडा नम्बर–१९, नेवारपानीस्थित कोशिस पेट्रोलपम्प नजिकै पुर्व–पश्चिम सडकखण्डमा ट्रकले ठक्कर दिँदा एकजनाको ज्यान गएको छ ।

मृत्यु हुनेमा मोटरसाइकल चालक हेटौंडा–९ का २५ वर्षीय अभिषेक सुवेदीको ज्यान गएको जिल्ला प्रहरी कार्यालय मकवानपुरका प्रहरी प्रवक्ता लक्ष्मी भण्डारीले जानकारी दिए ।

(आज) सोमबार बिहान ९ बजेर २० मिनेटको समयमा नवलपरासीबाट झापाको लागि सिमेन्ट लोड लिएर आउँदै गरेको बागमती प्रदेश ०३–००१ ख २०८६ नम्बरको ट्रकले हेटौंडाबाट मनहरीतर्फ जाँदै गरेको बागमती प्रदेश ०२–०२२ प २५०२ नम्बरको मोटरसाइकललाई ठक्कर दिँदा मोटरसाइकल चालक सुवेदी गम्भीर घाइते भएका थिए ।

घाइते सुवेदीलाई उपचारको लागि हेटौंडा अस्पताल ल्याइएकोमा बिहान १० बजेर ५ मिनेटको समयमा डाक्टरले मृत घोषणा गरेको हो । ट्रक चालक दाङको गडुवा गाउँपालिका–२ का २३ वर्षीय चन्द्र प्रसाद चौधरीलाई नियन्त्रणमा लिएको घटनाबारे थप अनुसन्धान गरिरहेको प्रहरीले जनाएको छ ।