रौतहटमा धारिलो हतियार प्रहारबाट एक वृद्धको हत्या भएको छ ।  गौर नगरपालिका–५ घर भएका ७४ वर्षीय अनिरुद्ध महतो (कोइरी) को हत्या भएको जिल्ला प्रहरी कार्यालय रौतहटले जनाएको छ ।

महतोको शव बुधबार बिहान घर नजिकैको धान खेतमा फेला परेको डीएसपी एलिजा गिरीले जानकारी दिइन् । ‘उहाँ धानखेतमै रहेको घरमा एक्लै बस्नु हुने रहेछ,’ गिरीले भनिन्, ‘घरदेखि झण्डै तीन सयमिटर पर धानखेतमा आज बिहान विभत्स अवस्थामा शव फेला परेको हो । हत्या ७/८ घण्टा अघि नै भएको जस्तो देखिन्छ ।’

महतोको शरीरका विभिन्न भागमा धारिलो हतियार प्रहार गरेका गहिरो चोट छन् । उनको शव पोस्टमार्टमको लागि प्रादेशिक अस्पताल गौरमा लगिएको छ ।

‘हत्या कसले र किन गर्‍याे खुलेको छैन । उहाँ छोरा-बुहारीसँग नबसी खेतबारी रुँघेर एक्लै बस्नुहुँदो रहेछ । हत्यामा  संलग्न भएको आशंकामा  अहिलेसम्म कसैलाई पक्राउ गरिएको पनि छैन,’ गिरीले भनिन्, ‘घटनाबारे थप अनुसन्धान भइरहेको छ ।’