हेटौंडा / बागमती प्रदेशका उद्योग वाणिज्य भूमि तथा प्रशासन मन्त्री सुकु माया तामाङले आवश्यकता हेरेर उद्योग सञ्चालन गर्न गाउँपालिका महासंघ बागमती प्रदेशलाई निर्देशन दिएकी छन् । 

सोमबार गाउँपालिका राष्ट्रिय महासंघ बागमती प्रदेश समितिसँग भएको छलफललाई सम्बोधन गर्दै मन्त्री तामाङले उद्योग सञ्चालन गर्दा सम्भाव्यता अध्ययन गरेर मात्रै सञ्चालन गर्न निर्देशन दिएकी हुन् ।
मन्त्री तामाङले आफू उद्योग मन्त्रीमा नियुक्त भइसकेपछि ‘एक पालिका, एक उद्योग’ भन्ने कार्यक्रमलाई अगाडि सारेको बताउँदै प्रदेश भरी उद्योग बढाउने र उद्यमी बनाउने आफ्नो उदेश्य रहेको बताइन् ।

‘स्थानीयस्तरमा उद्योग सञ्चालन गर्दा भुगोल , आवश्यकता र सम्भाव्यता अध्ययन गरेर मात्रै उद्योग सञ्चालन गर्नुपर्छ । मन्त्री तामाङले भनिन् ,’ ‘ स्थानीय स्रोत साधन पर्याप्त छ छैन , उद्योग सञ्चालन गर्दा युवा र महिलाहरूलाई रोजगारी दिनेगरी उद्योग सञ्चालन गर्नुपर्छ । मन्त्री तामाङले भोटको राजनीति नगरी समाज परिवर्तनका लागि काम गर्न समेत जनप्रतिनिधिलाई सुझाव दिदैँ नीतिगत सुधारका लागि स्थानीय सरकारकासँग समन्वय गरेर जाने प्रतिवद्धता जनाइन् ।

छलफलमा गाउँपालिका राष्ट्रिय महासंघका अध्यक्ष कर्ण बहादुर मगरले न्यायोचित ढङ्गले विकास निर्माणका कार्यहरु वितरण गर्न माग गरेका छन् । उनले मन्त्रालयबाट हुने कामहरु अभिभावक बनेर सहयोग गर्दै नीतिगत सुधारका लागि सहयोग गर्न आग्रह गरे । कार्यक्रममा महासंघ बागमती प्रदेश कार्यसमिति उपाध्यक्ष दिछ्यान शेर्पा , सहसचिव मान कुमारी पाख्रिन , कोषाध्यक्ष शंकर राज बराल र सदस्यहरू कृष्ण मान लामा , देविका थामी , सविता अर्याल , राम सिंह तामाङ लगायतको सहभागिता रहेको थियो ।