हेटौंडा / हेटौंडाको गौरीटार रङ्गशालामा सम्पन्न हेटौंडा उपमहानगरपालिका १५ नम्बर वडा खेलकुद विकास समितिको आयोजनामा अन्तर वडा स्तरीय १५ नं वडा अध्यक्ष कप फुटबल प्रतियोगिता २०८० को उपाधि वडा न १२ ले हात पारेको छ। आज ( आइतबार ) भएको फाइनल खेलमा वडा नम्बर १२ ले वडा नम्बर ७ लाई १–० को गोल अन्तरले पराजित गरि उपाधि जित्न सफल भएको हो ।

प्रतिस्पर्धात्मक खेलमा वडा न १२ का धनजित थिङले गरेको गोल निर्णायक बन्न पुगेको हो । निर्णायक गोल गरेका धनजित नै खेलको म्यान अफ द म्याच घोषित भएका छन् । अध्यक्ष कप फुटबल प्रतियोगिताको बिजयी १२ न वडाले नगद १ लाख सहित शिल्ड मेडल र प्रमाणपत्र प्राप्त गरेको छ । त्यसैगरी उपविजेता बनेको वडा न ७ ले भने नगद ५० हजार सहित शिल्ड मेडल र प्रमाणपत्र प्राप्त गरेको छ ।

त्यसैगरी विधागत पुरस्कारतर्फ वडा न ७ का राजु लामा उत्कृष्ट मिडफिल्ड र रोशन दोङ उत्कृष्ट डिफेन्डर बने । उत्कृष्ट गोलकिपरको पुरस्कार १२ न वडा का आयुष गोलेले हात पारे भने वडा न १२ का साजन पाख्रिनले उत्कृष्ट फरवार्ड सहित सर्वोत्कृष्ट खेलाडीको पुरस्कार जिते । विधागत उत्कृष्ट हुने खेलाडीले नगद २ हजार ५०० प्राप्त गर्दा सर्वोत्कृष्ट खेलाडीले ५ हजार हात पारे ।

चैत्र ९ गते देखी सुरु भएको प्रतियोगिताको समापन समारोहका प्रमुख अतिथि पूर्व मुख्यमन्त्री डोरमणि पौडेल, अखिल नेपाल फुटबल संघ एन्फाका केन्द्रीय सदस्य टीका लामा, १५ न वडा अध्यक्ष सुनिल मोक्तान लगायतले विजेता तथा उपविजेता खेलाडीहरूलाई पुरस्कृत गरेका थिए ।