हेटौंडा / मकवानपुरकाे कमानेस्थित एकादशी राधाकृष्ण मन्दिर संरक्षण समितिको आयोजनामा श्रीमद्भागवत महापुराण हुने भएको छ ।

बिहीबार हेटौंडा पत्रकार सम्मेलनको आयोजना गर्दै यही भदौ २९ गतेदेखि असोज ५ गतेसम्म महायज्ञ हुने जानकारी गराइएको छ । महायज्ञमा मुख्य कर्मको रुपमा आर्थिक संकट मोचन ग्रहशान्तिको कार्यक्रम रहेको मन्दिर संरक्षण समितिका अध्यक्ष शम्भुप्रसाद दुलालले जानकारी दिनुभएको छ ।

महायज्ञमा राधिाका दासीले कथा वाचन गर्नुहुनेछ । मन्दिर संरक्षण समितिका सदस्य धर्मराज पुडासैनीको संयोजकत्वमा मूल समारोह समिति बनाइएको छ भने विभिन्न उपसमितिहरु पनि गठन गरिएको छ । मन्दिरको नियमित कर्मका लागि नियमित आय सुनिश्चित गर्न अक्षयकोष स्थापना गर्ने उद्देश्यले पनि महायज्ञको आयोजना गरिएको संयोजक पुडासैनीको भनाइ छ ।

महायज्ञबाट ५० लाख रुपैयाँ सहयोग संकलन हुने अपेक्षा गरिएको र मन्दिरको स्तरोन्नति गरिने पुडासैनीले बताउनुभयो । महायज्ञमा हरेक दिन बिहान ११ बजेदेखि ३ बजेसम्म कथावाचन गरिनुका साथै आरती, मण्डप, पुजा तथा ग्रहशान्ति गरिने जनाइएको छ ।