हेटौंडा / १२ थान चोरीको मोटरसाइकलसहित बाराबाट प्रहरीले सात जनालाई पक्राउ गरेको छ । बाराको विभिन्न मिति र स्थानहरुबाट चोरी भएका १२ थान मोटरसाइकलसहित चोरीमा संलग्न ७ जनालाई प्रहरीले पक्राउ गरेको हो ।

पक्राउ पर्नेहरुमा जितपुर सिमरा उपमहानगरपालिका–१६ बस्ने १९ वर्षीय विर्धोज वाईवा, सोही उपमहानगरपालिका–१६ बस्ने १९ वर्षीय सुदर्शन बोम्जन, कलैया उपमहानगरपालिका–२० बस्ने २० वर्षीय दिपेन्द्र कुमार महतो, १९ वर्षीय राधेश्याम महतो, २१ वर्षीय सतेन्द्र कुमार गुप्ता, महागढीमाई नगरपालिका–९ बस्ने २० वर्षीय राजिनन्द महतो र रौतहट चन्द्रनिगाहपुर नगरपालिका–२ बस्ने २६ वर्षीय पंचालाल बलोन रहेका छन् ।

जिल्ला प्रहरी कार्यालय बाराबाट खटिएको प्रहरीले विभिन्न ठाउँबाट चोरी भएका बा.२६ प ७७५३, ज.११ प ८४९५, ना.५१ प २७९०, ना.५२ प ७१३२, बीआर०५ एफ ०६०३, बीआर ०५ ए ९०६२, ना.४१ प ८४६८, बा.९० प ५००८, मधेश प्रदेश ०३–०२६ प ९९५६, बा.६४ प ४६८४ र २ ‘अन टेस्ट’ लेखिएका मोटरसाइकलसहित उनीहरुलाई पक्राउ गरेको हो ।

उनीहरु उपर चोरी तथा डाँका सम्बन्धी मुद्दामा जिल्ला अदालत बाराबाट म्याद थप गरी आवश्यक अनुसन्धान भइरहेको जनाएको छ ।