हेटौंडा / मकवानपुरको हेटौंडा उपमहानगरपालिका वडा नम्वर ८ एचआईडी अगाडि आज बिहान यात्रुबाहक बस दुर्घटना हुँदा ६ जना घाइते भएका छन् ।

बिहान साढे १ बजेको समयमा धरानबाट काठमाण्डौ तर्फ आउदै गरेको बागमती प्रदेश–३–००१ ख १९८ न.को यात्रुबाहक बस आफै अनियन्त्रित भई सडकको दाहिने साईडमा पल्टन गई दुर्घटना हुँदा ६ जना घाइते भएको जिल्ला प्रहरी कार्यालय मकवानपुरका प्रहरी नायव उपरीक्षक टेकबहादुर कार्कीले जानकारी दिए ।

घाइते हुनेहरुमा ललितपुरको बागमती गाउँपालिका–५, चापागाउँ बस्ने २६ वर्षीय सुदेव घिमिरे, २९ वर्षीय पारस बस्नेत, काभ्रेको पाँचखाल नगरपालिका–२ बस्ने ३१ वर्षीय प्रेम लामा, रुपन्देहीको सिदार्थ नगरपालिका–१३ बस्ने ४० वर्षीया रजनी राई, ईलामको माई नगरपालिका–८ बस्ने २० वर्षीया सरु राई र चितवनको भरतपुर महानगरपालिका–१ बस्ने २२ वर्षीय काब्य मगर रहेका छन् ।

घाइते उनीहरुको हेटौंडा अस्पतालमा सामान्य उपचारपश्चात डिस्चार्ज गरिएको र अन्य यात्रुहरुलाई अर्को सवारी साधनमा गन्तब्य तर्फ पठाउने कार्य भईरहेको प्रहरी नायव उपरीक्षक कार्कीले बताए ।

उनका अनुसार, बस चालक भने हाल प्रहरीको सम्पर्कमा नआएको र घटनाको बारेमा आवश्यक अनुसन्धान गरिरहेको छ ।