हेटौंडा / बागमती प्रदेश प्रहरी कार्यालय हेटौँडाले तयार गरेको चाडपर्व लक्षित सुरक्षा योजना अनुसार पटका भित्राउन नदिनका लागि कुुकुर सहितको चेकिङ पनि सुरु गरिएको छ । बिशेषगरी पटका भित्रयाउन नदिनका लागि यो चेकिङ गर्न प्रहरीले दशै सकिएको केही दिनपछी सुरु गरेको हो । तर, हेटौंडा उपमहानगरपालिका वडा नम्बर–१५ रातोमाटेबाट व्यापारीहरुले दशैअघिनै तिहारलाई चाहिने पटका भित्राइसकेको एक प्रहरीले बताए ।

प्रहरी भन्दा एक कदम अगाडी व्यापारीहरु भएकाले पूर्व पस्चिम राजमार्ग अन्तरगत रातोमाटे नाकाबाट पटका भित्राएर काठमाण्डौं, चितवन लगायतका शहरमा खुद्रापसललाई बिक्री वितरण गरिसकेका छन् । तिहार नजिकिएपछी पटका ल्याउनका लागि प्रहरी अवरोध हुने भएकाले तिज लगतै व्यापारीहरुले पटका ल्याउने गरेका छन् ।

बागमती प्रदेश प्रहरी कर्यालय हेटौंडाका प्रवक्ता प्रहरी वरिष्ठ उपरिक्षक दिपक रेग्मीका अनुसार सिन्धुलीको कमलामाई नगरपालिका ९ भिमानमा र कमलामाई नगरपालिका १४ चन्दनपुरमा कुकुर सहितको प्रहरी चेकिङ गरिएको बताउनुभयो ।

विशेषगरि शुभ दीपावली तथा छठ पर्वलाई लक्षित गरी पटका लगायतका विष्फोटक जन्य पदार्थको ओसारपसारलाई नियन्त्रण गर्ने उद्देश्यले उक्त चेकिङ गरिएको हो ।
बागमती प्रदेश प्रहरी कार्यालय हेटौंडाबाट तालिम प्राप्त कुकुर सहित खटिएको प्रहरी टोलिले विष्फोटक पदार्थ, लागु औषध ओसारपसार र सम्भावित अवाञ्छित क्रियाकलाप गरी भाग्न सक्ने शंकित ब्यक्तिको चेकजाँच गरेको थियो ।

बागमती प्रदेश प्रहरी कार्यालय हेटौँडाले बिभिन्न राजमार्ग रहेका नाकाहरुमा कुकुर सहितको प्रहरी चेकिङ गर्दै आईरहेको छ । बिजया दशमीको समयमा मकवानपुर र चितवनमा गरिएको उक्त चेकीङ निकट भविष्यमा नै काभ्रे र धादिङ जिल्लाका बिभिन्न स्थानहरुमा गरिने भएको छ ।