विश्वका अधिकांश देशहरुमा कोरोना भाइरसको ‘ओमिक्रोन’ हावी भइरहेको अवस्थामा फ्रान्समा नयाँ भेरियन्ट फेला परेको छ । गत सोमबार पहिलो पटक फ्रान्सका मेडिटेरेनी इन्फेक्शनका शिक्षाविद् र वैज्ञानिकहरुले कोरोनाको नयाँ भेरियन्ट बी.१.६४०.०२ अर्थात् ‘आईएचयू’ पत्ता लगाएका हुन् ।

इन्डिपेन्डेन्टले रिपोर्ट गरे अनुसार मार्सेल्समा ‘आईएचयू’ भेरियन्टका करिब १२ वटा केसहरू पहिचान गरिएको थियो । हालसालै पश्चिमी अफ्रिकाको क्यामरूनको यात्रा गरेका व्यक्तिसँग आईएचयू भेरियन्टको पहिलो केस जोडिएको थियो ।

रिपोर्टमा थप भनिएको छ, ‘ती व्यक्ति क्यामरुनको तीन दिने यात्राबाट फ्रान्स फर्किएका थिए, र पूर्ण रूपमा खोप लगाइएको रिपोर्ट समेत गरिएको छ ।’

यद्यपि, अहिलेसम्म आईएचयू भेरियन्ट अन्य देशमा भने फेला परेको छैन । जसको कारण विश्व स्वास्थ्य संगठन (डब्ल्यूएचओ)द्वारा चिन्ताको भिन्नताको रूपमा लेबल गरिएको छैन ।

ओमिक्रोन भन्दा बढी उत्परिवर्तित

medRxiv मा प्रकाशित संस्थानको अध्ययन अनुसार आईएचयू अनुसन्धानकर्ताहरूले अक्सफोर्ड नानोपोर टेक्नोलोजीसँग नेक्स्ट जेनेरेशन सिक्वेन्सिङका साथ जिनोमहरू प्राप्त गरेका थिए । अनुसन्धनकर्ताहरुका अनुसार नयाँ भेरियन्ट आईएचयूमा ओमिक्रोन भन्दा बढी उत्परिवर्तनहरू पाइएको छ । जहाँ ४६ उत्परिवर्तनहरु गनिएका छन् ।

संस्थानका विभागका प्रमुख प्रोफेसर फिलिप कोल्सनले कोरोनाको नयाँ भेरियन्ट आईएचयू पत्ता लागेको पुष्टि गरेका हुन् । उनले भनेका छन्, ‘हामीसँग मार्सेलिस भौगोलिक क्षेत्रमा यो नयाँ भेरियन्टका धेरै केसहरू छन् । हामीले यसलाई ‘भेरिएन्ट आईएचयू’ नाम दिएका छौं । भर्खरै दुई वटा नयाँ जिनोमहरू पेश गरिएका छन् ।’

फ्रान्समा कोरोना महामारी सुरु भएयताकै सबैभन्दा बढी सङ्क्रमित

फ्रान्सका स्वास्थ्य अधिकारीहरुले यहाँ ठूलो संख्यामा दैनिक कोभिड सङ्क्रमित भेटिएका बताएका छन् । यूरोपमा पछिल्ला दिनहरुमा कोभिडको नयाँ भेरियन्ट ओमिक्रोन फैलिएसँगै सङ्क्रमितको संख्या पनि दिन प्रतिदिन बढ्दै गएको यहाँका अधिकारीरुले जनाएका छन् ।

मंगलबार त्यसको पछिल्लो २४ घन्टामा फ्रान्समा २ लाख ७१ हजार ६८६ जनामा सङ्क्रमण देखिएको अधिकारीहरुले जनाएका छन् । यो संख्या फ्रान्समा कोभिडको महामारी सुरु भएयताकै सबैभन्दा धेरै सङ्क्रमित भेटिएका बताइएको छ ।

फ्रान्सबाहेक अन्य युरोपेली देश ग्रीस, पोर्चुगल, इटाली र बेलायतमा पनि अहिलेसम्मकै उच्च संख्यामा सङ्क्रमित भेटिएका समाचारहरु आइरहेका बताइएको छ ।

पछिल्ला दिनहरुमा क्रिसमस बिदा र नयाँ वर्षको पूर्वसन्ध्यामा मानिसहरुको जमघटका कारण पनि युरोपमा कोभिड तीव्र गतिमा फैलिएको बताइएको हो ।साथै मंगलबार दिएको जानकारीअनुसार हाल त्यहाँका २० हजार भन्दा बढी व्यक्ति अस्पताल भर्ना भएका छन् । तीमध्ये तीन हजार ६०० भन्दा बढी आईसीयूमा भर्ना भएका बताइएको छ ।

कोभिडको पछिल्लो लहरले युरोपको स्वास्थ्य प्रणालीलाई नै तहसनहस पार्न सक्ने विश्व स्वास्थ्य संगठन(डब्लूएचओ)ले चेतावनी दिँदै आएको छ । जनवरीदेखि फ्रान्समा दैनिक सङ्क्रमितको संख्या दुई लाख ५० हजार नाघ्ने फ्रान्सका स्वास्थ्यमन्त्री ओलिभिअर भेरानले बताएका छन् ।