हेटौंडा /  नेपाली कांग्रेस हेटौंडा उपमहानगर कार्यसमितिको सभापति पदका लागि रामकृष्ण कोइरालाले उम्मेदवारी घोषणा गरेका छन्। जनप्रतिनिधिको अनुभव, संगठनमा सक्रिय भूमिका र पार्टीप्रतिको निरन्तर निष्ठालाई आधार बनाउँदै कोइरालाले आगामी नेतृत्वका लागि आफ्नो दाबी प्रस्तुत गरेका हुन्।

कोइराला हेटौंडा उपमहानगरपालिका–१६ का दुई कार्यकाल निर्वाचित वडाध्यक्ष हुन्। स्थानीय तहमा जनप्रतिनिधिका रूपमा काम गरेको अनुभवसँगै पार्टी संगठनभित्र पनि उनले लामो समयदेखि सक्रिय भूमिका निर्वाह गर्दै आएका छन्।

२०७४ सालको स्थानीय तह निर्वाचनमा तत्कालीन हेटौंडा उपमहानगरपालिका–१९ र २१, हालको हेटौंडा–१६ बाट नेपाली कांग्रेसका तर्फबाट वडाध्यक्षमा निर्वाचित भएका कोइराला २०७९ सालको स्थानीय तह निर्वाचनमा समेत पुनः निर्वाचित भएका थिए।

दुई कार्यकाल जनप्रतिनिधिका रूपमा काम गरेको अनुभवलाई नगर संगठनको नेतृत्वमा उपयोग गर्ने लक्ष्यसहित उनले सभापतिमा उम्मेदवारी अघि सारेका हुन्।

नेपाली कांग्रेसको १४औँ महाधिवेशनबाट हेटौंडा उपमहानगर कार्यसमितिको उपसभापतिको जिम्मेवारी पाएका कोइरालाले पार्टी संगठनको सुदृढीकरण र विस्तारमा आफू निरन्तर क्रियाशील रहेको बताएका छन्।

हालको राजनीतिक परिवेशमा कांग्रेससामु देखिएका चुनौती सामना गर्न बलियो संगठन, एकता, अनुशासन र जनतासँगको प्रत्यक्ष सम्बन्ध आवश्यक रहेको उनको भनाइ छ।

कोइरालाले आफू निर्वाचित भए हेटौंडाका १९ वटै वडालाई समान रूपमा समेट्दै संगठनलाई चलायमान बनाउने, नेता–कार्यकर्ताबीचको दूरी घटाउने र कांग्रेसलाई जनतासँग अझ नजिक जोड्ने प्रतिबद्धता व्यक्त गरेका छन्।

उनले आफ्नो उम्मेदवारीलाई व्यक्तिगत पदको आकांक्षाभन्दा पनि विगतको जनप्रतिनिधि अनुभव र संगठनमा गरेको कामलाई नगर नेतृत्वमा उपयोग गर्ने जिम्मेवारीका रूपमा प्रस्तुत गरेका छन्।

“दुई कार्यकाल जनप्रतिनिधिका रूपमा जनताको बीचमा रहेर काम गरेको अनुभव र पार्टी संगठनमा प्राप्त जिम्मेवारीबाट सिकेको कुरालाई अब हेटौंडा नगर कांग्रेसको नेतृत्वमा उपयोग गर्न चाहन्छु। तपाईंहरूको साथ, विश्वास र सहयोग प्राप्त भए कांग्रेसलाई अझ सशक्त, व्यवस्थित, एकताबद्ध र जनमुखी संगठनका रूपमा अघि बढाउन पूर्ण प्रतिबद्ध भएर काम गर्नेछु,” उनले भने।

कोइरालाले हेटौंडा उपमहानगरपालिकाका १९ वटै वडाका कांग्रेस कार्यसमिति, पदाधिकारी, क्षेत्रीय प्रतिनिधि, अग्रज तथा अभिभावक, दिदीबहिनी, दाजुभाइ, निष्ठावान् सहकर्मी तथा शुभेच्छुकहरूसँग साथ, सहयोग, समर्थन र मतका लागि अपिल पनि गरेका छन्।

दुई कार्यकालको जनप्रतिनिधि अनुभव, संगठनको जिम्मेवारी र नगर नेतृत्वको नयाँ दाबी—रामकृष्ण कोइरालाले हेटौंडा कांग्रेसको नेतृत्वका लागि आफूलाई मैदानमा उभ्याएका छन्।