हेटौंडा /  हेटौंडा उपमहानगरपालिका वडा नम्बर १५ ले जनताको आधारभूत आवश्यकतालाई केन्द्रमा राख्दै महत्त्वपूर्ण सामाजिक कार्यक्रम सञ्चालनमा ल्याएको छ। चालु आर्थिक वर्ष २०८२ को माघ महिनादेखि प्रत्येक घरधुरीलाई १० हजार लिटर निःशुल्क खानेपानी वितरण, निःशुल्क एम्बुलेन्स सेवा तथा बिरामीका लागि निःशुल्क रगत उपलब्ध गराउने योजना औपचारिक रूपमा सुरु गरिएको वडा कार्यालयले जनाएको छ।

वडा नम्बर १५ का वडा अध्यक्ष सुनिल मोक्तान का अनुसार यी कार्यक्रम जनप्रतिनिधिको सामाजिक उत्तरदायित्वअन्तर्गत ल्याइएको हो। उनले भने, “हामी जनप्रतिनिधि हौँ, यो हाम्रो सामाजिक दायित्व पनि हो र चुनावका बेला जनतामाझ गरिएको प्रतिबद्धताको कार्यान्वयन पनि हो।”

अध्यक्ष मोक्तानले वडावासीले गरेको विश्वासको सम्मानस्वरूप सेवा–सुविधा विस्तार गरिएको उल्लेख गरे। उनले जनताको आधारभूत आवश्यकता पूरा गर्न वडा कार्यालय सधैं प्रतिबद्ध रहेको पनि स्पष्ट पारे। उनले भने, “हामीलाई वडावासीले गर्नुभएको विश्वासको प्रतिफलस्वरूप यी कार्यक्रम अघि बढाएका हौँ। आगामी दिनहरूमा पनि जनताको आवश्यकता र सुझावका आधारमा यस्ता जनमुखी कार्यक्रमलाई स्थानीय सरकारमार्फत निरन्तरता दिनेछौँ।”

वडा नम्बर १५ मा सुरु गरिएको निःशुल्क खानेपानी कार्यक्रमले आर्थिक रूपमा कमजोर तथा विपन्न परिवारलाई प्रत्यक्ष राहत पुग्ने विश्वास लिइएको छ। त्यसैगरी, आकस्मिक स्वास्थ्य समस्यामा परेका बिरामीलाई तत्काल अस्पताल पुर्‍याउन निःशुल्क एम्बुलेन्स सेवा प्रभावकारी हुने अपेक्षा गरिएको छ। निःशुल्क रगत उपलब्ध गराउने व्यवस्थाले आपतकालीन अवस्थामा जीवनरक्षा सहज बनाउने वडा कार्यालयको दाबी छ।

स्थानीयवासीहरूले वडाले अघि सारेका यी कार्यक्रमलाई सकारात्मक रूपमा लिएका छन्। सामाजिक सुरक्षालाई प्राथमिकता दिँदै जनताको दैनिकीसँग प्रत्यक्ष जोडिएका सेवा प्रवाह गर्नु स्थानीय सरकारको महत्वपूर्ण दायित्व भएको उनीहरूको भनाइ छ।

वडा नम्बर १५ को यो पहललाई स्थानीय तहबाट नागरिक केन्द्रित सेवा विस्तारको देशकै उदाहरणका रूपमा हेरिएको छ।