जेनजी आन्दोलनका क्रममा काठमाडौँका विभिन्न कारागारबाट भागको सात जना कैदीबन्दी पक्राउ परेका छन् ।  जिल्ला प्रहरी परिसर, काठमाडौँका अनुसार, खोजतलासका क्रममा काठमाडौँका विभिन्न स्थानबाट सात जनालाई पक्राउ गरिएको छ ।

पक्राउ पर्नेमा रसुवाको उत्तरगया गाउँपालिका-१ घर भई काठमाडौँको गोकर्णेश्वर नगरपालिका-६ मा बस्ने ४१ वर्षीय तेन्जिङबहादुर तामाङ, लमजुङको दूधपोखरी गाउँपालिका-४ घर भई हाल काठमाडौँको कलंकी बस्ने २० वर्षीय प्रियम गुरुङ र कञ्चनपुरको पुनर्वास नगरपालिका घर भई हाल काठमाडौँको सुन्धारा बस्ने २३ वर्षीया बबिता तामाङ पक्राउ परेको जिल्ला प्रहरी परिसर, काठमाडौँका प्रहरी उपरीक्षक (एसपी) पवनकुमार भट्टराईले बताए ।

त्यस्तै, काभ्रेपलाञ्चोकको ठाँटी चापखोरीका २२ वर्षीय विक्रम नेपाली, दोलखाको मेलुङ गाउँपालिका-२ का भुवन तामाङ, सिन्धुलीको फिक्कल गाउँपालिका-३ का अनिस मगर र भारतीय नागरिक सरोसन साह पक्राउ परेका हुन् । उनीहरू डाँका चोरी, मानव बेचविखन, लागूऔषध, ज्यान मार्ने उद्योग लगायतका मुद्दामा जेल परेका थिए ।

सातै जनालाई पक्राउ गरेर सम्बन्धित कारागारमा बुझाइएको एसपी भट्टराईले बताए।