हेटौंडा / मकवानपुरगढी गाउँपालिका वडा नम्बर–३ मक्रान्चुलीमा आज सार्वजनिक सुनुवाइ कार्यक्रम सम्पन्न भएको छ। जनपत्र मिडिया प्रा.लि. हेटौंडा–२ को आयोजनामा तथा संसद् सहयोग परियोजना र संयुक्त राष्ट्रसंघीय विकास कार्यक्रम (यूएनडीपी) को सहकार्यमा कृषकका समसामयिक समस्याहरूको समाधानमा सांसदहरूको भूमिका सम्बन्धमा सार्वजनिक सुनुवाइ कार्यक्रम गरिएको हो।
कार्यक्रमको उद्घाटन बागमती प्रदेशको उद्योग, पर्यटन, वन तथा वातावरण समितिका सभापति आनन्द कुमार श्रेष्ठले गर्नुभयो।
उहाँले मकवानपुरसहित बागमती प्रदेशका विभिन्न जिल्लाका कृषकहरू विविध समस्यामा परेको उल्लेख गर्दै खेतबारीमा धान, मकै जस्ता अन्नबाली रोप्दा मल नपाउने समस्या, दूधको भुक्तानी समयमा नपाउने समस्या जस्ता समस्याहरू बढ्दो क्रममा रहेको बताउनुभयो। उहाँले यस्ता समस्याहरू संसद् र समितिमा उठाउने प्रतिबद्धता जनाउनुभयो।
किसानले उत्पादन गरेका अन्नबाली तथा तरकारीको उचित मूल्य नपाउने, बिचौलियामार्फत बिक्री गर्नुपर्ने बाध्यता, र दूधको भुक्तानी नपाउँदा किसानहरू थप समस्यामा परेको सभापति श्रेष्ठले बताउनुभयो।
कार्यक्रममा सहभागी कृषकहरूले प्रत्येक वर्ष भोग्नुपर्ने समस्या पुनः दोहोरिइरहेको गुनासो गरेका थिए। गाई, भैंसी र कुखुरालाई महँगो मूल्यमा दाना किनेर खुवाउनुपर्ने तर उत्पादन सस्तोमा बिक्री गर्नुपर्ने बाध्यताले किसानहरू चिन्तित बनेका छन्। यस्तो समस्या बागमती प्रदेशभर फैलिएको छ।
कार्यक्रममा बागमती प्रदेशका पूर्वमन्त्री तथा प्रदेशसभा सदस्य एका लाल श्रेष्ठ, प्रदेशसभा सदस्यहरू प्रेमबहादुर पुलामी, सुष्मा भुजेल न्यौपाने, बालकुमारी विश्वकर्मालगायतले कृषकका समस्याको समाधानमा सधैँ हातेमालो गर्दै अगाडि बढ्ने प्रतिबद्धता व्यक्त गर्नुभयो।
सुनुवाइ कार्यक्रममा मकवानपुरगढी गाउँपालिकाका अध्यक्ष दोर्जे लामा स्याङतान, वडा नं.–३ का वडा अध्यक्ष भागवत घिमिरे, जिल्ला दुग्ध उत्पादक सहकारी संस्था लिमिटेड मकवानपुरका अध्यक्ष हरिप्रसाद कडेललगायतले मन्तव्य व्यक्त गर्नुभएको थियो।
कार्यक्रममा मनकामना दुग्ध उत्पादक सहकारी संस्थाका अध्यक्ष अर्जुनप्रसाद दाहाल, व्यवस्थापक शशी लंसाललगायतले किसानले अहिले भोगिरहेको दूधको भुक्तानी समस्या तथा अन्य विभिन्न क्षेत्रका समस्याहरू राख्नुभएको थियो।
मकवानपुरका कृषकहरू झनै समस्यामा परेका छन्। उनीहरूले उत्पादन गरेको दूधको भुक्तानी समयमा नपाउँदा ठूलो समस्यामा परेको सार्वजनिक सुनुवाइमा उल्लेख गरिएको छ। किसानहरूले दूध दुग्ध सहकारीमार्फत बिक्री गर्ने गरेका छन्, जुन दूध सरकारी स्वामित्वको हेटौंडा दुग्ध वितरण आयोजना र निजी डेरीहरूले खरिद गर्दै आएका छन्। तर, समयमै भुक्तानी नपाउँदा किसानहरू चिन्तित बनेका छन्।
जिल्ला दुग्ध उत्पादक सहकारी संस्था लिमिटेडमार्फत सरकारी र निजी डेरीहरू गरी १८ वटा उद्योगले २०८१ साल बैशाख मसान्तसम्ममा २२ करोड ५ लाख ३७ हजार १७५ रुपैयाँ किसानलाई भुक्तानी गर्न बाँकी छ। यो रकम किसानहरूको लागि निकै ठूलो हो, किनभने उनीहरूको मुख्य आम्दानीको स्रोत नै दूध बिक्री हो।
केही उद्योगहरूले किसानसँग उधारोमा दूध खरिद गरेर नगदमा बिक्री गरे पनि भुक्तानी समयमा नगर्ने र केहीले त अन्यत्रै खर्च गर्ने गरेको बताइएको छ।
गत आर्थिक वर्षमा मात्र १८ वटा डेरी उद्योगहरूले २९ करोड ६८ लाख ४६ हजार ८८६ रुपैयाँ किसानलाई भुक्तानी गर्न बाँकी राखेका छन्। सबैभन्दा बढी भुक्तानी दिन बाँकी सरकारी स्वामित्वको हेटौंडा दुग्ध वितरण आयोजनाले १ करोड २२ लाख ८८ हजार रुपैयाँ तिर्न बाँकी छ।
मकवानपुरमा २६ वटा निजी डेरीहरूले भने नियमित रूपमा दूध खरिद गरेबापतको भुक्तानी जिल्ला दुग्ध उत्पादक सहकारी संघलाई दिने गरेका छन्। तर, बाँकी १८ वटा उद्योगहरूले भने सधैं आलटाल गर्दै आएका छन्।
बितेको फागुनदेखि बैशाखसम्म किसानहरूले जम्मा ३६ करोड ३१ लाख ९२ हजार ७०२ रुपैयाँको भुक्तानी पाएका छन्।
जिल्ला दुग्ध उत्पादक सहकारी संघले दैनिक ५३ हजार लिटर दूध खरिद गरी बिक्री गर्दै आएको छ। मकवानपुरको मनहरी र बकैया गाउँपालिकाको सहकार्यमा पनि दैनिक एक लाख लिटर दूध खुलेआम किसानहरू स्वयं र पालिकाहरू मार्फत निजी डेरीहरूलाई बिक्री हुँदै आएको छ।
