मकवानपुरको भीमफेदी गाउँपालिका–१ सुपारिटार ब्यारेकस्थित त्रिभुवन राजपथमा दुई मोटरसाइकल एकआपसमा ठोक्किँदा दुई जना घाइते भएका छन्।

प्रहरीका अनुसार हेटौंडाबाट भैंसेतर्फ जाँदै गरेको बा ६० प ४९५४ नम्बरको मोटरसाइकलले ओभरटेक गरी अगाडि बढ्ने क्रममा विपरीत दिशाबाट आउँदै गरेको बा ३८ प ९३७८ नम्बरको मोटरसाइकललाई ठक्कर दिएको हो।

दुर्घटनामा बा ६० प ४९५४ नम्बरको मोटरसाइकल चालक भारतको बिहार राज्य, पूर्वी चम्पारण घर भई हाल काठमाडौंको कोटेश्वर बस्ने करिब ३७ वर्षीय सकिम आलम घाइते भएका छन्। उनको दाहिने खुट्टामा चोट लागेको छ भने अवस्था मध्यम रहेको प्रहरीले जनाएको छ।

त्यस्तै, अर्को मोटरसाइकल चालक सुनसरीको बर्जु गाउँपालिका–१ बस्ने करिब ४९ वर्षीय केसरी साह पनि घाइते भएका छन्। उनको दाहिने खुट्टा र ढाडमा चोट लागेको छ। उनको अवस्था सामान्य रहेको बताइएको छ।

दुवै घाइतेलाई उपचारका लागि हेटौंडा अस्पताल पठाइएको र उनीहरूको सोही अस्पतालमा उपचार भइरहेको छ।

दुर्घटनामा दुवै मोटरसाइकलमा क्षति पुगेको छ। दुवै मोटरसाइकल तथा सम्बन्धित कागजपत्र प्रहरी चौकी चौकीटोलको नियन्त्रणमा रहेको प्रहरीले जनाएको छ।