बागमती प्रदेश सरकारले अनलाइनबाटै पटके रुट पर्मिट दिने व्यवस्था गरेको छ। प्रदेशको श्रम, रोजगार तथा यातायात मन्त्रालयले यातायात व्यवस्था सेवा कार्यालय, सल्लाघारी भक्तपुरबाट सेवा शुभारम्भ गरिएको हो ।

प्रदेशका श्रम रोगार तथा यातायात मन्त्री लक्ष्मण लम्सालले मंगलबार उक्त सेवाको शुभारम्भ गरे । सेवाको उद्घाटन गर्दै मन्त्री लम्सलले यातायात कार्यालयहरूमा लाग्ने सेवाग्राहीको भिडलाई नियन्त्रण गरी प्रविधिमैत्री सेवा प्रवाह गर्ने उद्देश्यअनुसार अनलाइनबाटै पटके रुट पर्मिट सेवा दिन थालिएको बताए ।

सेवाग्राहीले आफ्नो अनुकूल रुट इजाजत लिन विवरण भरेर अनलाइनबाटै राजस्व तिर्न सक्ने र सो बापतको बिल मोबाइलमा देखाएर यात्रा गर्न सक्ने उनले बताए  । मन्त्रालयमातहतको यातायात व्यवस्था कार्यालयहरूबाट उक्त सेवा प्राप्त गर्ने गरी अनलाइनबाटै पटके रुट इजाजत लिन पाइने भएको छ ।

यातायात व्यवस्था कार्यालयबाट हाल प्रवाह भइरहेको पटके रुट इजाजत सेवालाई मन्त्रालयले विकास गरेको यातायात व्यवस्थापन सूचना प्रणाली (टीएमआईएस) मार्फत जारी हुने भएको मन्त्रालयले जनाएको छ । मन्त्रालयका अनुसार पहिलो चरणमा पटके रुट इजाजत जारी गर्ने कार्यालयहरूबाट सो सेवा उपभोग गर्न पाइने छ । काठमाडौँ उपत्यका सहितका ६ वटा यातायात व्यवस्था कार्यालयबाट उक्त सेवा पाइने उनले बताए ।

यातायात व्यवस्था कार्यालय खुर्कोट, सिन्धुली, यातायात व्यवस्था कार्यालय साना-ठूला सवारी एकान्तकुना, ललितपुर, यातायात व्यवस्था कार्यालय, हेटौंडा मकवानपुर, यातायात व्यवस्था कार्यालय, भरतपुर चितवन, यातायात व्यवस्था सेवा कार्यालय काठमाडौँ ढुंगेअड्डा र यातायात व्यवस्था सेवा कार्यालय, सल्लाघारी भक्तपुरबाट उक्त सेवा पाइने छ ।