नेपाली कांग्रेसले गठबन्धनबारे लगाएका आरोपहरूको खण्डन गर्दै प्रधानमन्त्री पुष्पकमल दाहाल ‘प्रचण्ड’ले आफ्नो मूल लक्ष्य देशमा सुशासन, सामाजिक न्याय र समृद्धि कायम गर्नु रहेको बताएका छन्।

संसद्मा बोल्दै प्रचण्ड निरन्तर सुशासन कायम गर्ने प्रतिबद्धता व्यक्त गरे। उनले गठबन्धनका सबै घटकका तर्फबाट सुशासन, सामाजिक न्याय र समृद्धि नै आफ्नो लक्ष्य रहेको बताए। सरकार गठनको बाटो कति जोखिमपूर्ण छ भन्ने उनले स्विकारे तर यसबाट आउने परिणामप्रति विश्वस्त देखिए।

प्रचण्डले भने, “मसँग दुई विकल्प थिए, औसत र तदर्थ सरकार चलाएर पदको रक्षा गरिरहने कि पदको जोखिम उठाएरै भए पनि आफ्नो राजनीतिक प्रतिबद्धताअनुसार राष्ट्रनिर्माणमा लाग्ने? मैले दोस्रो विकल्प रोजेँ।”

आफूले चालेका कदम देश र जनताको हितमा रहेको दाबी गर्दै प्रधानमन्त्रीले कसैलाई यो कदम अस्थिरता लाग्न सक्ने तर आफ्नो पदभन्दा पनि देश र जनताको हित बढी महत्त्वपूर्ण रहेको स्पष्ट पारे।