आइतबार एकैदिन सुनको मूल्य तोलामा २ हजार रुपैयाँले वृद्धि भएको छ। नेपाल सुनचाँदी व्यवसायी महासंघका अनुसार, अघिल्लो कारोबार दिन प्रति तोला १ लाख १९ हजार रुपैयाँ रहेको सुन आइतबार १ लाख २१ हजार रुपैयाँमा पुगेको हो।

अन्तर्राष्ट्रिय बजारमा शुक्रबार सुनको मूल्य उच्च भएकाले आइतबार नेपाली बजारमा प्रभाव परेको महासङ्घले जनाएको छ। शनिबार सार्वजनिक बिदा भएकाले सुनको मूल्य समायोजन हुँदैन। विगत केही दिनयता सुनको मूल्य लगातार बढ्दै गएको छ।

त्यस्तै, चाँदीको मूल्य पनि आइतबार तोलामा २० रुपैयाँले बढेको छ। अघिल्लो कारोबार दिन प्रति तोला १ हजार ३९० रुपैयाँ रहेको चाँदी आइतबार १ हजार ४१० रुपैयाँमा कारोबार भएको छ।