काभ्रेको बनेपा नगरपालिका वडा नं ९ का वडाध्यक्ष नृपेश वादे १५ लाख रुपैयाँ घूसहित बुधबार भक्तपुरको गठ्ठाघरमा रंगेहात पक्राउ परेका छन् ।

घरबाटो सिफारिस गर्ने प्रयोजनको लागि सेवाग्राहीसँग घुस माग गरिरहेको भन्ने सूचना एवं उजुरी निवेदनका आधारमा अख्तियार दुरुपयोग अनुसन्धान आयोग, टंगालबाट खटिई गएको टोलीले वादेलाई सेवाग्राहीबाट १५ लाख रुपैयाँ घूस लिइसकेको अवस्थामा पक्राउ गरेको अख्तियारले जनाएको छ ।

वादेको साथबाट स्रोत नखुलेको १० हजार जापानी येन, एक सय अमेरिकी डलरको नोट र ह्युन्डाईको आईटेन कार पनि बरामद भएको अख्तियारका प्रवक्ता नरहरि घिमिरेले जनाएका छन्। साथै चालकलाई समेत नियन्त्रणमा लिई थप अनुसन्धान भइरहेको घिमिरेले बताए । वादे २०७९ को स्थानीय निर्वाचनमा कांग्रेसबाट निर्वाचित वडाध्यक्ष हुन्।