हेटौंडा / मकवानपुरको थाहानगरमा सवारी दुर्घटना हुँदा १ जनाको मृत्यु भएको छ ।

शनिबार बेलुका मकवानपुरको थाहा नगरपालिका ९ चित्लाङको प्रहरी चौकी भन्दा अलि माथि काठमाण्डौंबाट थाहानगर आउँदै गरेको ना ४ ख ८७७३ नम्बरको यात्रुबाहक बसमा काठमाण्डौंतर्फ जाँदै गरेको बा ६५ प ४१७६ नम्बरको मोटरसाइकल ठोकिदा दुर्घटना भएको हो । दुर्घटनामा दुई जना घाइते मध्य १ जनाको मृत्यु भएको मकवानपुर प्रहरीले जनाएको छ । मृत्यु हुनेमा मोटरसाइकल चालक थाहा नगरपालिका १० बस्ने ३० वर्षीय मनोज गमाल रहेका छन् ।

काठमाडौंबाट चित्लाङतर्फ आँउदै गरेको बस र विपरित दिशाबाट आउँदै गरेको मोटरसाइकल एक आपसमा ठक्कर खाँदा मोटरसाइकल चालक मनोज र थाहा नगरपालिका १० कै शम्भु गमाल घाइते भएका थिए । मनोज गम्भीर घाइते भई उपचारको लागि ट्रमा सेन्टर काठमाण्डौं  लगेकोमा उपचारको क्रममा मृत्यु भएको जिल्ला प्रहरी कार्यालय मकवानपुरले जनाएको छ ।

प्रहरीका अनुसार मोटरसाइकल पछाडि सवार शम्भुको मनमोहन अस्पताल काठमाडौमा उपचार भइरहेको तथा अवस्था सामान्य रहेको छ । मोटरसाइकल, बस र बस चालक इलाका प्रहरी पालुङको नियन्त्रणमा रहेको छ ।