वैशाख १० मा हुने उपनिर्वाचनका लागि रवि लामिछानेले आफ्नो उम्मेदवारी दर्ता गराएका छन् । चितवन निर्वाचन क्षेत्र नम्बर २ बाट उनले प्रतिनिधि सभाको सदस्य पदका लागि राष्ट्रिय स्वतन्त्र पार्टीबाट उम्मेदवारी दर्ता गराएका हुन् ।
निर्वाचन अधिकृतको कार्यालयमै पत्नी र समर्थकहरुसहित पुगेका छामिछानेले पूर्वनिर्धारित समय भन्दा अगाडि नै उम्मेदवारी दर्ता गराएका हुन् । पार्टी सभापतिसमेत रहेका लामिछाने आजै तनहुँ क्षेत्र नं. १ मा जाँदैछन् । कांग्रेस छाडेर आएका डा. स्वर्णिम वाग्लेलाई उनले तनहुँबाट उम्मेदवार उठाउँदै छन् ।
लामिछानेले १ बजेकाे दर्ता समय लिएका भए पनि तनहुँ जानुपर्ने भएकाले आज बिहान १० बजे नै मुख्य निर्वाचन अधिकृतको कार्यालयमा पुगी आफ्नो उम्मेदवारी दर्ता गराएका हुन् । उनको प्रस्तावकमा सीता ज्ञवाली र समर्थकमा विक्रम श्रेष्ठ रहेका छन् ।
उम्मेदवारी दर्तापछि सञ्चारकर्मीसँग प्रतिक्रिया दिँदै उनले निर्वाचन स्वच्छ र स्वस्थ प्रतिस्पर्धामा होस् भन्ने चाहना रहेको बताए । प्रतिनिधिसभाको निर्वाचन भएको चार महिनापछि निर्वाचन हुनु दुःखद् भएको र यसमा आफ्नो पनि कमजाेरी रहेकाे भन्दै उनले आफू निर्वाचनका लागि उत्साहित भएको बताए ।
‘मुलुकको समृद्धि, सुशासन, राजनीतिमा एउटा शुद्धता, आगामी पुस्ताको सुन्दर भविष्य कोर्न तथा लोकतन्त्रका लागि मैले आफ्नो उम्मेदवारी दिएकाे हुँ,’ लामिछानेले भने, ‘उपचुनाव हुनुमा मेरो भागमा परेको जिम्मेवारी म लिन तयार छु ।”,
नागरिकता प्रकरणमा आफू उम्मेदवार हुन नपाउने भन्ने तर्क गलत भएको भन्दै उनले थप भने, ‘मैले अमेरिकाको नागरिकता सन् २०१८ मै त्यागेको हो । संविधानमा त्यसरी त्यागेको मितिले तीन महिना भनेकाले त्यसले मलाई असर गर्दैन ।’
उपनिर्वाचनका लागि चितवन क्षेत्र नं २ मा उमेदवारी दर्ता गर्ने उहाँ पहिलो भएको सहायक निर्वाचन अधिकृत ईश्वर आचार्यले जानकारी दिए । चितवनमा मुख्यतः नेपाली कांग्रेस, नेकपा एमाले, राप्रपा लगायत दलले उम्मेदवारी दर्ता गर्न २ बजेदेखि ४ बजेसम्मको समय लिएका छन् । उनीहरू सबैभन्दा पहिले लामिछानेले उम्मेदवारी दर्ता गराएका हुन् । बेलुका ५ बजेसम्म उम्मेदवारी दर्ता गर्न सकिनेछ ।
लामिछाने यसअघि गत मङ्सिरमा समपन्न प्रतिनिधिसभा निर्वाचनमा यसै निर्वाचन क्षेत्रबाट विजयी भएका थिए । नागरिकता मुद्दामा सर्वोच्च अदालतको फैसलाले उनको सांसद पद गुमेपछि यो क्षेत्रमा उपनिर्वाचन हुन लागेको हो ।
गत चुनावमा लामिछानेले ४९ हजार दुई सय ६१ मत प्राप्त गर्नुभएको थियो भने प्रतिस्पर्धी नेपाली कांग्रेसका उमेश श्रेष्ठले १५ हजार ९९ र नेकपा (एमाले)का कृष्णभक्त पोख्रेलको १४ हजार छ सय ४९ मत प्राप्त गरेका थिए ।
चितवन क्षेत्र नं २ मा यसपटक एक लाख २४ हजार छ सय ९५ जना मतदाता छन् । उनीहरुले ४३ स्थलका एक सय ३८ केन्द्रमा मतदान गर्नेछन् ।