चिलिमे जलविद्युत कम्पनी लिमिटेडले चालू आर्थिक वर्षको तीन महिनामा रू. २० करोड ७८ लाखभन्दा बढी खुद नाफा गरेको छ । गत वर्षको पहिलो त्रैमाससम्मको तुलनामा कम्पनीको खुद नाफा २ दशमलव १४ प्रतिशत बढी भएको हो ।

गत वर्ष यस अवधिसम्म कम्पनीले रू. २० करोड ३५ लाखभन्दा बढी खुद नाफा गरेको थियो । यस वर्षको पहिलो त्रैमाससम्म कम्पनीले रू. ३५ करोड ५८ लाखभन्दा बढीको विद्युत विक्री गरेको छ । गत वर्षभन्दा यस वर्ष कम्पनीको विद्युत विक्री आम्दानी १ दशमलव १८ प्रतिशत बढी भएको हो । सञ्चालन नाफा घटेपनि वित्तीय आम्दानी बढेकाले कम्पनीको खुद नाफा बढ्न सहयोग मिलेको हो ।

गत वर्षभन्दा यस वर्ष कम्पनीले ३ दशमलव २१ प्रतिशत कम रू. २२ करोड ८३ लाख सञ्चालन नाफा गरेको छ । गत वर्ष रू. २ करोड ५२ लाखभन्दा बढी वित्तीय आम्दानी गरेको कम्पनीले यस वर्ष रू. ३ करोड ९१ लाखभन्दा बढी यो आम्दानी गरेको छ ।

७ दशमलव ५० प्रतिशत बोनस शेयर वितरण गरी कम्पनीको चुक्तापूँजी रू. ६ अर्ब ७५ करोड १७ लाख ९४ हजार पुगेको छ । रिटेन्ड अर्निग भने गत वर्षभन्दा करिब ५ प्रतिशत कम रू. ३ अर्ब ८३ करोड २६ लाख कायम भएको छ । प्रतिशेयर आम्दानी रू. १२ दशमलव १९ रहेको कम्पनीको प्रतिशेयर नेटवर्थ रू. १५६ दशमलव ७७ रहेको छ ।