भारतको पश्चिम बंगालस्थित कोलकाताका एक जना फोटो पत्रकार झापामा जेल जीवन बिताइरहेका छन् । २४ वर्षीय दुर्लभ राय चौधरी नक्कली डलर बोकेको अभियोगमा समातिएका हुन् ।

उनी गत मंसिर २ गते कोलकाताबाट सिलिगुडी हुँदै काँकडभिट्टाबाट नेपाल छिरेपछि भद्रपुर विमानस्थलबाट पक्राउ परेका थिए । भद्रपुर विमानस्थलबाट काठमाडौं जाने क्रममा नक्कली डलरसहित समातिएका हुन् ।

उनले फोटोकपी गरिएको एक सय दरको डलर २२६ थान बोकेका थिए । प्रहरीले मंसिर २४ गते झापा जिल्ला अदालतमा पेश गरेपछि उनलाई खोटा मुद्रासम्बन्धी अभियोगमा पुर्पक्षका लागि हिरासतमा राखिएको थियो । अदालतको आदेशपछि उनी अहिले झापा कारागारमा छन् ।

चौधरीले ‘मनी इज नथिङ’ नामको छोटो फिल्म बनाएर युट्युब च्यानलमा राख्ने प्रयोजनका लागि नेपाल आएको अदालतमा दिएको बयानमा बताएका छन् ।

अदालतमा विचाराधीन मुद्दामाथि नेपाली फोटो पत्रकारहरुले आफ्ना धारणा राखेका छन् । चौधरी नक्कली नोटको कारोबारी नभएको दाबी गर्दै राष्ट्रिय फोटो पत्रकार समूह नेपालका अध्यक्ष प्रदीपराज वन्तले रिहाइका लागि अनुरोध गरेका हुन् ।

उनले नक्कली मुद्रा अपचलनका लागि नभएर भिडियो सुटिङका लागि मात्र अमेरिकी डलरको फोटोकपी गरेको वन्तको भनाइ छ ।