भरतपुरको मेयरमा मेरो विकल्प छैन, अरु कसैको मलाई डर छैनः जगन्नाथ पौडेल

पालिका डायरी
२० बैशाख २०७९
भरतपुरको मेयरमा मेरो विकल्प छैन, अरु कसैको मलाई डर छैनः जगन्नाथ पौडेल

३० वैशाखमा हुने स्थानीय तह निर्वाचनको माहोलले अहिले देशको राजनीतिलाई तताएको छ । चितवनको भरतपुर महानगरपालिका यो निर्वाचनका लागि सामाजिक सन्जाल, मिडिया र चिया पसलका चर्चालाई आधार मान्ने हो भने थप बढी तातेको छ ।

सत्तारुढ गठबन्धनले भागवण्डा गर्दा नेपाली कांग्रेसले चितवनका नेता तथा कार्यकर्ताको चाहनाविपरित भरतपुरको मेयरको उम्मेदवार नेकपा माओवादी केन्द्रलाई दिइयो । नेकपा माओवादी केन्द्रले अध्यक्ष पुष्पकमल दाहाल प्रचण्डपुत्री रेनु दाहाललाई मेयरको उम्मेदवार बनाएपछि त्यहाँका कांग्रेस नेता तथा पूवैसांसद जगन्नाथ पौडेलले मेयरमा नै उम्मेदवारी दिए ।

पौडेललाई उम्मेदवारी फिर्ता गराउन कांग्रेसले लामो समयसम्म प्रयास गरेको थियो । कांग्रेस नेता तथा गृहमन्त्री बालकृष्ण खाँण, राज्यमन्त्री उमेश श्रेष्ठलगायतले उनलाई चितवनमा नै पुगेर उम्मेदवारी फिर्ता लिन अनुरोध गरे । कांग्रेसका सभापति शेरबहादुर देउवा, वरिष्ठ नेता रामचन्द्र पौडेलले उनलाई बारम्बार फोन पनि गरे ।

तर, पौडेलले उम्मेदवारी फिर्ता लिएनन् । निर्वाचन आयोगले पौडेललाई चुनाव चिह्नका रुपमा भुइँकटहर दिएको छ । ७१ वर्षका पौडेल बागी उम्मेदवारी दिएपछि कांग्रेसबाट कारवाहीमा परेका छन् ।

अनेक प्रयासहरु हुँदा पनि तपाईंले आफ्नो उम्मेदवारी फिर्ता लिनु भएन । किन ?

किनकि मलाई भरतपुरलाई समृद्ध र नमूना महानगर बनाउन मन छ । भरतपुर महानगरपालिका एउटा उदयीमान महानगर हो । यसको गर्भमा अनन्त सम्भावनाहरु छन्, यसलाई पूरा गर्न मैले आफ्नो उम्मेदवारी दिएको हुँ र यसलाई फिर्ता लिइनँ ।

केन्द्रले र कांग्रेसले समेत गठबन्धन गर्ने र भरतपुरमा रेनु दाहाललाई मेयर बनाउने निर्णय गर्दा पनि तपाईंले उम्मेदवारी दिनुभयो नि ? यतिका लामो वर्ष कांग्रेसको सदस्य तपाईंको यसपटक किन बागी उम्मेदवारी ?

यो मेरो बागी उम्मेदवारी होइन । सबैभन्दा पहिले यो कुरा सबैले बुझ्न जरुरी छ । म जुन पदमा उम्मेदवार छु र म जुन पार्टीको सदस्य हुँ, त्यो पार्टीको भरतपुरमा मेयर पदमा उम्मेदवारी छैन । हसिया हथौडा चुनाव चिह्न भएको पार्टीविरुद्ध मैले उम्मेदवारी दिनु बागी होइन । म नेपाली कांग्रेसको प्रतिनिधित्व गरेर उम्मेदवारी दिएको हुँ । यहाँ माओवादीले अन्याय गरेर टिक्न दिएको छैन, त्यसैले कांग्रेसबाट मैले स्वतन्त्र उम्मेदवारी दिएको हुँ ।

तपाईंलाई त अब पार्टीले कारवाहीसमेत गरिसकेको छ । यसलाई कसरी लिनु भएको छ ?

मैले समाचारहरुरबाट थाहा पाएँ, ममाथि कारवाही भयो भन्ने कुरा । कुनै विधि र प्रक्रिया पुर्याएर मलाई निष्कासन गरिएको छैन, मलाई प्रष्टिकरण पनि सोधएिको छैन, मैले जवाफ दिने मौका पनि पाएको छैन । त्यसैले यदि मलाई निष्कासन गरिएको हो भने पनि त्यो अनुचित छ । विधान र कानुनविपरित छ । त्यसैले म यसलाई निष्कासन मान्दिनँ ।

अर्को कुरा, नेपाली कांग्रेस यस्तो पार्टी हो जसले आफ्नो कार्यकर्तालाई न्याय दिँदैन । उसले आफ्नो छिमेकीको स्वार्थका लागि काम गर्छ । मलाई त्यो पार्टीमा बस्न मन छैन । म पदको भोगी पनि छैन, पैसाको भोगी पनि होइन । म भ्रष्टाचार गर्दिनँ, म कुनै पदको सौदाबाजी पनि गर्दिनँ ।

मैले राजनीति सेवा गर्नका लागि गरेको हो । अनि सेवाका लागि कांग्रेसमा नै रहनु पर्छ भन्ने पनि होइन । म स्वतन्त्र रहेर पनि समाजसेवा गर्न सक्छु । तर, के चाहिँ सत्य हो भने मलाई कांग्रेसबाट निकालेको तरिका पुगेको छैन ।

 

तपाईंको उम्मेदवारी फिर्ता होस् भन्ने चाहना राखेर केन्द्रबाट नै मन्त्रीहरुसमेत आउनु भएको थियो, तर तपाईंले मान्नु भएन नि ?

केन्द्रको निर्देशन मैले किन मान्ने ? मैले अरुको आदेश मान्न पर्ला भनेर नै म लोकतन्त्रवादी भएको हो । मेरो विवेकले जायज नदेखिएको कुरा म कसरी मान्न सक्छु । उहाँहरुले मेरो उम्मेदवारी, मेरो संवैधानिक हकलाई बेवास्ता गर्दै मेरो उम्मेदवारी फिर्ता गर्न भन्नुभएको हो । मैले मानिनँ । म कुनै प्रलोभनमा परेर आफ्नो स्वाभिमान बेच्ने मान्छे होइन ।

भरतपुरका मतदाताले मेयरमा तपाईंलाई मतदान गर्ने आधार के छन् ?

म पुरानो मान्छे हुँ । अनुभवी मान्छे हुँ । नगरपालिका चलाएको अनुभव छ । म सांसद पनि भएको मान्छे हुँ । संविधानविद् हुँ । अबको महानगरपालिका चलाउने भनेको सरकार चलाउने हो । र, त्यो सरकार चलाउनलाई कार्यकरिणी अधिकार चाहिन्छ । न्यायपालिकासम्बन्धि अधिकार चाहिँदैन । सरकार चलाउनलाई विभागीय अधिकारहरु चाहिन्छ । त्यसो भएको हुनाले त्यो सबै काम गर्नको लागि म योग्य व्यक्ति छु । त्यसैले मैले भरतपुरको मेयरमा उम्मेदवारी दिएको हुँ, यसैलाई आधार मानेर मत पाउँछु भन्नेमा ढुक्क पनि छु ।

 

तपाईंले गठबन्धन र नेकपा एमालेका उम्मेदवारलाई जित्न सक्छु भन्ने कल्पना गर्नुभएको छ ?

जितका लागि मेरो तयारी भरपुर छ । मैले जित्छु भन्ने राष्ट्रिय स्तरमा नै चर्चा चलेको छ, मेरो योग्यता क्षमता र अनुभवको पनि कुरा छ । अहिले सिंगो पार्टी नै व्याप्त लोभ र स्वार्थमा उभिएको बेला म एक निष्ठावान कार्यकर्ता हुँ । त्यसकारणले पनि म योग्य हुँ । मेरो विकल्पमा भरतपुुरको मेयरका लागि अरु कोही देख्दिनँ । सार्थक अजेन्डा लिएर म जनतामाझ गइरहेको छु, निर्वाचनको तयारीमा जुटेको छु । मैले एमाले र गठबन्धन दुवैलाई जित्नेछु, म यसमा विश्वस्त छु ।

प्रतिक्रिया