चितवनमा राष्ट्रिय निकुञ्जको टोलीले हानेको गोली लागेर जंगली हात्ती मकुना मरेको छ।

बुधबार नियन्त्रणमा लिने प्रयास गर्दा टोलीलाई आक्रमण गर्न खोजेपछि आत्मरक्षाका लागि गोली चलाउन बाध्य भएको राष्ट्रिय निकुञ्जले जनाएको छ । जंगल बाहिर निस्किएर दु:ख दिन थालेपछि चितवन राष्ट्रिय निकुञ्जको कोर क्षेत्रतर्फ पठाउने क्रममा गोली प्रहार हुँदा मकुना मारिएको हो ।

निकुञ्ज र यहाँको सुरक्षार्थ खटिएको नयाँ गोरखगण (क) गुल्म सौराहाका नेपाली सेनाको संयुक्त टोलीमाथि नै जाइलागेपछि मकुनालाई गोली हानिएको थियो । निकुञ्जका सूचना अधिकारी अविनाश थापामगरका अनुसार बुधबार दिउँसो हात्ती स्विप गस्ती टोलीले स्विपिङ गर्दै जाँदा कुमरोज मध्यवर्ती सामुदायिक वनको लामिताल इलाकामा अकस्मात् मकुनासँग भेट भएको थियो ।

‘उसले घरपालुवा हात्ती चुरेगजलाई आक्रमण गर्न लागेपछि अन्य विकल्प नभएकाले राष्ट्रिय निकुञ्ज तथा वन्यजन्तु संरक्षण ऐन २०२९ को दफा २१ मा भएको व्यवस्था बमोजिम आत्मरक्षाका लागि टोलीले २ राउन्ड ‘वार्निङ’ (चेतावनी) हवाई फायर गरेको थियो’, सूचना अधिकारी थापामगरले भने, ‘त्यसो गर्दा पनि मकुना भागेन । ऊ थप आक्रामक बन्दै खगेन्द्रप्रसाद नामको सानो हात्तीमाथि जाइलाग्यो । खगेन्द्रप्रसादमा सवार रेजर श्याम तामाङ भुइँमा खसे । उनको सुरक्षा गर्न अत्यन्तै कठिन भएपछि स्विप टोलीले मकुनालाई ३ राउन्ड गोली हानेको थियो ।’

उनका अनुसार गोली हानेपछि मकुना केही पर भागेको थियो । तर फेरि फर्किएर आक्रमण गर्न आएपछि टोलीले अर्को राउन्ड गोली प्रहार गरेको थियो । गोली लागेपछि भागेको उक्त जंगली हात्ती खोजी गर्दै जाँदा करिब एक किलोमिटर पर ढलेको अवस्थामा भेटिएको थापाले बताए । तत्कालै उठाउने प्रयास गर्दा नउठेपछि दिउँसो साढे ३ बजेतिर पशु चिकित्सकसहितको प्राविधिक टोलीले मकुना मरिसकेको घोषणा गरेको उनले बताए ।

घटनास्थलमा हात्तीको पोस्टमार्टम गर्दा घाँटीको दाहिनेतर्फ एउटा गोली लागेको पाइएको छ । मकुना गत असोजदेखि सौराहा क्षेत्रमा देखिन थालेको थियो । जंगलमा भन्दा बस्तीतर्फ बढी देखिन थालेपछि उसलाई कोर क्षेत्रमा पठाउन निकुञ्जले प्रयास गरिरहेको थियो ।