यसका लागि ललितपुरको भैँसेपाटीस्थित मुख्यमन्त्री निवासमा शनिबार दिउँसो बसेको कांग्रेस बागमती प्रदेश संसदीय दलको बैठकले मुख्यमन्त्री बानियाँका पक्षमा मत दिन आफ्ना सबै सांसदलाई ह्विप पनि जारी गरिसकेको छ।  तर आफ्ना पक्षका ३ जनलाई मन्त्री नबनाइएको भन्दै रुष्ट निवर्तमान मुख्यमन्त्री लामा पक्षका १४ सांसदले पार्टीको ह्विप नमान्ने चेतावनी दिएका हुन्।

लामाले मुख्यमन्त्री पदबाट राजीनामा दिनुअघि आफूपक्षीय ३ प्रदेश सांसदलाई मन्त्रीमा नियुक्ति गरेका थिए। तर विवादका कारण उनीहरूको शपथ हुन सकेन। पछि पार्टीका केन्द्रीय सभापति शेरबहादुर देउवाको निवासमा दुई पक्षबीच भएको छलफलमा ती ३ जनालाई नयाँ सरकारमा पनि मन्त्री बनाउने भनी बानियाँले सहमति जनाएकाले लामा मुख्यमन्त्री पदबाट राजीनामा दिन राजी भएका थिए।

तर अहिले उक्त सहमति कार्यान्वयन नगरिएको भन्दै लामा समूह मुख्यमन्त्री एवं आफ्नो संसदीय दलका नेता बानियाँसँग रिसाएको हो।  मुख्यमन्त्री बानियाँले आफ्नै समूहका सांसदलाई मात्रै अवसर दिएको, आफूले सिफारिस गरेको तीन सांसदलाई मन्त्री नबनाएको तथा बानियाँ समूहले आफूहरूसँग कुनै संवाद नै नगरेकाले विश्वासको मत नदिने विचार गरिएको निर्वतमान मुख्यमन्त्री लामाले बताए।

तर यस विषयमा निष्कर्षमा पुग्न अहिले दिउँसोका लागि १४ सांसदको भेला बोलाइएको लामानिकट प्रदेश सांसद गोविन्द लम्सालले जानकारी दिए।  ‘मुख्यमन्त्रीले विश्वासको मतका लागि ह्विप जारी गर्नुभएको छ, सो सम्बन्धमा छलफल गर्नका लागि हामीले भेलाको अयोजना गरेका छौँ,’ लम्सालले भने, ‘भेलामा हामी कसरी अघि बढ्ने भनेर छलफल गर्छौं।’

यसपछि पार्टी सभापति देउवालाई भेट्न काठमाडौँ जाने तयारी पनि रहेको उनले बताए।  ‘बैठकपश्चात् सभापतिज्यूलाई भेट्न जाने तयारी छ। उहाँसँग बसेर हाम्रो रणनीति सुनाउनेछौँ। उहाँ सकारात्मक हुनुभयो र हाम्रो माग कार्यान्वयन गराउन मुख्यमन्त्रीलाई निर्देशन दिनुभयो, माग सम्बोधन भएर तीन मन्त्री नियुक्त गरियो भने विश्वासको मत दिन्छौँ। नत्र सभापतिलाई राजीनामापत्र बुझाएर फर्कन्छौँ’, सांसद लम्सालले भने।  लामा समूहका १४ सांसदले सामूहिक हस्ताक्षर गरेको राजीनामापत्र तयार रहेको उनको भनाइ छ।

बानियाँलाई पर्न सक्छ संकट
लामा समूहका सांसदले विश्वासको मत नदिए मुख्यमन्त्री बानियाँलाई संकट पर्ने देखिन्छ।  ११० सदस्यीय बागमती प्रदेश सभामा बहुमतका लागि ५६ सांसदको समर्थन आवश्यक पर्छ। प्रदेश सभामा कांग्रेसका ३७ र सत्ता साझेदार एमालेका २७ सांसद छन्। सत्तारुढ दुवै दलका गर्दा सांसदको कुल संख्या ६४ हुन्छ।

यसमा लामा समूहका १४ सांसद सामेल भएनन् भने बानियाँका पक्षमा ५० जना मात्रै हुन्छ। जसका कारण उनी विश्वासको मतमा फेल हुन सक्छन्। र, मुख्यमन्त्री यात्रा एक सातामै टुंगिन सक्छ।

प्रदेश सभामा रहेका प्रमुख प्रतिपक्षी माओवादी केन्द्रलगायत अन्य दलले पनि अहिलेसम्म बानियाँलाई विश्वासको मत दिने संकेत गरेका छैनन्।