हेटौंडा / मकवानपुरको भीमफेदी गाउँपालिका–६ एघारघुम्तीस्थित भीमफेदी–कुलेखानी–काठमाडौं सडक खण्डमा आज बिहान करिब ११:२० बजे हाईस गाडी दुर्घटना भएको छ।
काठमाडौंबाट हेटौंडातर्फ जाँदै गरेको बा ३ ख ७८७६ नम्बरको हाईस गाडीको ब्रेक फेल भई सडकको भित्तामा ठोक्किँदा दुर्घटना भएको प्रहरीले जनाएको छ। गाडीमा चालकसहित १० जना सवार रहेकोमा ३ जना घाइते भएका छन्।
घाइतेहरूलाई उद्धार गरी उपचारका लागि हेटौंडा अस्पताल पठाइएको छ भने अन्य यात्रुहरू सामान्य चोटपटक लागेर घटनास्थलबाटै आफैं उपचारका लागि गएका छन्।
घाइते हुनेहरूमा उदयपुर त्रियुगा नगरपालिका–११ गाईघाटका करिब ८६ वर्षीय गोरे राई रहेका छन्। उनको टाउकोमा गम्भीर चोट लागेको छ। ब्रेक फेल भएपछि गाडीबाट हाम फाल्ने क्रममा पछाडिको टायरले कुल्चिँदा उनी गम्भीर घाइते भएका हुन्।
त्यस्तै, गोरे राईकी छोरी करिब ६२ वर्षीया हर्क माया राईको निधार र दाहिने हातमा चोट लागेको छ। उनी पनि गाडीबाट हाम फाल्दा घाइते भएकी हुन्। अर्का घाइते उदयपुर त्रियुगा नगरपालिका–१० गाईघाटका करिब ३५–४० वर्षका शम्भु कटुवाल हुन्, जसको टाउकोमा मध्यम चोट लागेको छ।
दुर्घटनाग्रस्त गाडी घटनास्थलमै रहेको छ र गाडीमा क्षति पुगेको प्रहरीले जनाएको छ। दुर्घटनापछि सडक अवरुद्ध भने भएको छैन। हाईस चालक हाल सम्पर्कमा नरहेको बताइएको छ।
घटनाबारे थप अनुसन्धान भइरहेको प्रहरीले जनाएको छ।
