हेटौँडा / भुटनदेवी मावि, हेटौँडा–४ ले भौतिक र शैक्षिक स्तर अन्तर्राष्ट्रिय गुणस्तर कायम गर्ने भएको छ।
भुटनदेवी मावि र ग्लोबल क्वालिटी काउन्सिल, नेपालका प्रतिनिधिबीच आइतबार एक कार्यक्रममा आईएसओमा जाने सम्झौता भएको हो। विद्यालय व्यवस्थापन समितिका अध्यक्ष नवीन सिग्देल, विद्यालयका प्रअ सूर्यप्रसाद घिमिरे र काउन्सिलका प्रतिनिधि सुदीप शर्माले सम्झौतापत्रमा हस्ताक्षर गर्नुभएको थियो।
विद्यालय व्यवस्थापन समिति, शिक्षक तथा अभिभावक संघ, विद्यालय अनुगमन समितिका सदस्यहरूलाई अन्तर्राष्ट्रिय गुणस्तर मापदण्ड र सूचकबारे अभिमुखीकरण कार्यक्रम समेत सञ्चालन गरिएको विद्यालयका प्रअ सूर्यप्रसाद घिमिरेले जानकारी दिनुभयो।
एक वर्षभित्र अर्थात् आगामी २०८३ चैत मसान्तभित्र अन्तर्राष्ट्रिय गुणस्तर प्रमाणीकरण गरिसक्ने लक्ष्य रहेको विद्यालय व्यवस्थापन समितिका अध्यक्ष नवीन सिग्देलले बताउनुभयो। उहाँले भौतिक संरचनाको गुणस्तरीय व्यवस्थापन र शैक्षिक वातावरण अन्तर्राष्ट्रिय स्तरको मापदण्ड कायम गरिने प्रतिबद्धता समेत व्यक्त गर्नुभयो। विद्यालयको प्रारम्भिक वस्तुस्थितिको परीक्षण र आगामी ३ वर्षे शैक्षिक गुणस्तर ढाँचा तयार गरिएको ग्लोबल क्वालिटी काउन्सिल, नेपालका प्रतिनिधि सुदीप शर्माले जानकारी दिनुभयो। शर्माले सामुदायिक विद्यालयमा मकवानपुरको पहिलो अन्तर्राष्ट्रिय गुणस्तर प्रमाणीकरण भएको विद्यालय भुटनदेवी मावि हुने समेत बताउनुभयो।
विभिन्न चरणमा भएको छलफल र अन्तरक्रियामा विद्यालय व्यवस्थापन समितिका अध्यक्ष नवीन सिग्देल, विद्यालयका प्रअ सूर्यप्रसाद घिमिरे, ग्लोबल क्वालिटी काउन्सिल, नेपालका प्रतिनिधि सुदीप शर्मासहितको टोली, शिक्षक तथा अभिभावक संघ, नेपालका अध्यक्ष निकेशकृष्ण श्रेष्ठ, विद्यालय अनुगमन समितिका संयोजक इन्द्रप्रसाद नेपाल, टोल विकास संस्था नगर समन्वय समितिका अध्यक्ष ध्रुव अधिकारी, महासचिव शिवहरिलगायत विभिन्न समितिका सदस्यहरूबीचको छलफलपछि अन्तर्राष्ट्रिय गुणस्तर प्रमाणीकरणमा जाने सम्झौता गरिएको विद्यालय सह-प्रअ तथा विद्यालय आईएसओ वेदराज कोइरालाले स्पष्ट पार्नुभयो।
