हेटौंडा /  नेपाल कम्युनिस्ट पार्टी (एमाले) मकवानपुर जिल्ला कमिटीको आज बसेको आठौँ सचिवालय बैठकले पार्टी जिल्ला कमिटीका उपाध्यक्ष हिदम लामालाई कार्यबाहक अध्यक्षको जिम्मेवारी प्रदान गरेको छ।

पार्टीका जिल्ला अध्यक्ष श्रीधर पोख्रेल ले सामाजिक सञ्जाल फेसबुक मार्फत आफ्नो अध्यक्ष पदबाट राजीनामा सार्वजनिक गरेपछि आज बसेको सचिवालय बैठकले लामालाई कार्यबाहक अध्यक्षको जिम्मेवारी दिने निर्णय गरेको हो।

बैठकले पार्टीको संगठनात्मक कामलाई निरन्तरता दिन तथा जिल्ला कमिटीका नियमित गतिविधि सञ्चालन गर्न उपाध्यक्ष लामालाई कार्यबाहक अध्यक्षको जिम्मेवारी दिने निर्णय गरेको जनाइएको छ।

पार्टीभित्र संगठन सुदृढीकरण गर्ने, कार्यकर्ताबीच एकता कायम राख्ने तथा आगामी कार्यक्रमहरू प्रभावकारी रूपमा सञ्चालन गर्ने अपेक्षासहित उक्त जिम्मेवारी प्रदान गरिएको एक सचिवालय सदस्यले बताएका छन्।

यस निर्णयसँगै पार्टीका नेता तथा कार्यकर्ताहरूले कार्यबाहक अध्यक्षको जिम्मेवारी सम्हालेका हिदम लामालाई विभिन्न माध्यमबाट बधाई तथा सफल कार्यकालको शुभकामना व्यक्त गरिरहेका छन्। साथै, राजीनामा दिएका अध्यक्ष श्रीधर पोख्रेलले पार्टी र जिल्लाको राजनीतिमा पुर्‍याएको योगदानको पनि सराहना गरिएको छ।

पार्टी स्रोतका अनुसार अब आगामी बैठकहरू मार्फत जिल्लामा संगठनात्मक गतिविधि तथा राजनीतिक कार्यक्रमहरूलाई अझ सक्रिय रूपमा अघि बढाइने बताइएको छ।