हेटौंडा /  नेपाल कम्युनिस्ट पार्टी (नेकपा एमाले) मकवानपुरका उपाध्यक्ष हिदम लामाले पछिल्लो प्रतिनिधि सभा निर्वाचनको परिणाम आफ्नो पक्षमा आउन नसकेको स्वीकार गर्दै जनताको निर्णयलाई पूर्ण सम्मानका साथ स्वीकार गरिएको जनाएका छन्।

एमाले मकवानपुरका उपाध्यक्ष हिदम लामाले आज आफ्नो फेसबुकमार्फत एक वक्तव्य जारी गर्दै लोकतन्त्रमा जनताको मत नै सर्वोच्च हुने भएकाले प्राप्त परिणामलाई सम्मानपूर्वक स्वीकार गरिएको उल्लेख गरेका छन्। उनले यस निर्वाचनमा विजयी भएका राष्ट्रिय स्वतन्त्र पार्टी (रास्वपा) का उम्मेदवारलाई हार्दिक बधाई तथा सफल कार्यकालको शुभकामना व्यक्त गरेका छन्।

वक्तव्यमा मकवानपुरका जनताले देखाएको तीव्र परिवर्तनको अपेक्षा र विश्वासअनुसार विजयी उम्मेदवारहरूले विकास र समृद्धिका लागि प्रभावकारी रूपमा काम गर्ने विश्वास व्यक्त गरिएको छ।

त्यस्तै, निर्वाचनमा सूर्य चिन्हमा मतदान गर्दै पार्टीप्रति विश्वास व्यक्त गर्ने सम्पूर्ण मकवानपुरे मतदाताप्रति एमाले मकवानपुरले आभार व्यक्त गरेको छ। साथै, चुनावी अभियानका क्रममा दिनरात खटिने पार्टीका नेता, कार्यकर्ता, शुभेच्छुक तथा समर्थकहरूप्रति पनि धन्यवाद ज्ञापन गरिएको छ।

“राजनीतिमा हार–जित स्वाभाविक प्रक्रिया हो, तर जनताको सेवा गर्ने हाम्रो प्रतिबद्धता कहिल्यै हार्दैन,” उपाध्यक्ष लामाको वक्तव्यमा उल्लेख गरिएको छ।

आगामी दिनहरूमा पनि जनताको हित, विकास र समृद्धिका लागि पार्टी निरन्तर सक्रिय रहने प्रतिबद्धता एमाले मकवानपुरका उपाध्यक्ष लामाले व्यक्त गरेका छन्।