मकवानपुर क्षेत्र नम्बर २ का उम्मेदवार महेश बर्तौला घरदैलो कार्यक्रम अन्तर्गत मतदाता भेटघाटका क्रममा नामटार पुग्दा उत्साहपूर्ण वातावरण देखिएको छ। स्थानीय बासिन्दाले बर्तौलालाई स्वागत गर्दै विकासप्रति देखिएको सक्रियताप्रति सकारात्मक प्रतिक्रिया जनाएका छन्।

सो अवसरमा कैलाश गाउँपालिकाकी पूर्व उपाध्यक्ष सुकुमायाँ थिङले ४१ वर्षदेखि निर्माण सुरु भएर पनि अलपत्र अवस्थामा रहेको सडक २०७९ सालको निर्वाचनपछि कालोपत्रे भएको उल्लेख गर्दै खुशी व्यक्त गरिन्। उनले उक्त उपलब्धिप्रति प्रसन्नता जनाउँदै खुशीको गीतसमेत गाएकी थिइन्। स्थानीय स्तरमा लामो समयदेखि प्रतिक्षा गरिएको पूर्वाधार सम्पन्न भएपछि जनजीवनमा सहजता आएको उनको भनाइ थियो।

उम्मेदवार बर्तौला यतिबेला चुनावी अभियानलाई तीव्र बनाउँदै जनताको घर–आँगनमै पुगेर मत मागिरहेका छन्। पछिल्लो समयमा कैलाश गाउँपालिकाका विभिन्न स्थानसहित भीमफेदी क्षेत्रअन्तर्गत सानुटार, किसेडी, सालघारी, बाघमारा, भीमफेदी बजार, सुपिङ, कोगटे र इपा लगायतका स्थानमा कार्यक्रम तय गरी प्रत्यक्ष मतदाता भेटघाटलाई निरन्तरता दिइरहेका छन्।

घरदैलो कार्यक्रममार्फत स्थानीय आवश्यकता, विकासका प्राथमिकता र आगामी योजनाबारे छलफल गर्दै बर्तौलाले आफू जनताको भरोसाको प्रतिनिधि बन्न प्रतिबद्ध रहेको बताएका छन्।