हेटौंडा/  मकवानपुरको भीमफेदी गाउँपालिका–८ महादेवटारस्थित छोक्रेडाँडामा निर्माणाधीन काठमाडौँ–तराई मधेस द्रुतमार्ग (फास्ट ट्र्याक) अन्तर्गत १ नम्बर पुलमा खाडल खन्ने क्रममा भएको दुर्घटनामा एक जनाको मृत्यु भएको छ भने अर्का एक जना घाइते भएका छन्।

गत माघ २७ गते साँझ करिब ६:०० बजे काम सकेर खाल्डोबाट टुचन मेसिनमा सवार भई फर्कने क्रममा मेसिनको ब्रेक फेल भई करिब २१ मिटर तल खसेको थियो। दुर्घटनामा सिन्धुपाल्चोक जिल्ला, पाँचपोखरी थाङपाल गाउँपालिका–५ घर भई फास्ट ट्र्याक आयोजनामा कार्यरत अन्दाजी २९ वर्षीय अर्जुन थिङको घटनास्थलमै मृत्यु भएको हो।

उक्त समयमा खाडलभित्र रहेका पाँचपोखरी थाङपाल गाउँपालिका–६ घर भई सोही आयोजनामा कार्यरत अन्दाजी ३७ वर्षीय जुल्फे तामाङलाई माथिबाट खसेको टुचन मेसिनले ढाडमा चोट पुर्‍याई घाइते बनाएको थियो। उनलाई तत्काल उद्धार गरी उपचारका लागि काठमाडौं पठाइएको निर्माणको जिम्मा पाएको कम्पनीले जनाएको छ।

राष्ट्रिय गौरवको आयोजनाअन्तर्गत चाइना स्टेट कम्पनीद्वारा निर्माण भइरहेको उक्त आयोजनामा कार्यरत निर्माण श्रमिकको मृत्यु पश्चात् नेपाल ट्रेड युनियन महासंघ (जिफन्ट) मकवानपुर जिल्लाको समन्वयमा आश्रित परिवारलाई ३७ लाख रुपैयाँ क्षतिपूर्ति प्रदान गरिएको छ। हालसम्म निर्माण श्रमिकको मृत्यु हुँदा प्रदान गरिने यो अधिकतम क्षतिपूर्ति रकम रहेको नेपाल ट्रेड युनियन महासंघ (जिफन्ट) मकवानपुर जिल्ला अध्यक्ष शम्भु लामाले बताएका छन्।

नेपाल ट्रेड युनियन महासंघ (जिफन्ट) मकवानपुर जिल्ला अध्यक्ष लामाको पहल तथा क्युपेक नेपाल मकवानपुर र स्थानीय नेताहरू सुमन ब्लोन र बिशम ब्लोनको सहयोगमा मृतक श्रमिकका आश्रित परिवारले उक्त क्षतिपूर्ति प्राप्त गरेका हुन्।