समयमै पानी परेपछि बागमती प्रदेशमा धान रोपाइँले तीव्रता पाएको छ। आकाशे पानीको भरमा धान रोप्नुपर्ने किसानहरुका लागि समयमै पानी परेपछि बागती प्रदेशमा धान रोपाइँ समेत उत्साहजनक देखिएको  छ।

बागमतीमा हालसम्म ७६.४८ प्रतिशत रोपाइँ सम्पन्न भएको बागमती प्रदेशको कृषि तथा पशुपन्छी विकास मन्त्रालयले जनाएको छ। मन्त्रालयका प्रवक्ता सुजन कडेँलका अनुसार प्रदेशका अधिकांश धान रोपाइँ हुने स्थानमा यस वर्ष समयमै पानी पर्न सुरु गरेकाले विगतभन्दा धेरै हेक्टर जमिनमा धान रोपाइँ सम्पन्न भएको हो। हालसम्म ९२ हजार २ सय ५०.८५ हेक्टर जमिनमा धान रोपाइँ सम्पन्न भएको हो।

काठमाडौँको ५ हजार ९ सय २४ हेक्टर क्षेत्रफल, ललितपुरको ४ हजार १ सय ६३ हेक्टर क्षेत्रफल र भक्तपुरको २ हजार ६ सय ९९ हेक्टर क्षेत्रफलमा रोपाइँ सम्पन्न भएको प्रवक्ता कडेँलले जानकारी दिए। उनका अनुसार यस तीन जिल्लाका सबै धान रोपाइँ हुने जमिनमा रोपाइँ सम्पन्न भएको हो।

यस्तै, हालसम्मको अवधिमा सबैभन्दा कम रोपाइँ रसुवामा भएको छ। यहाँ हालसम्म ३७.७० प्रतिशत मात्रै रोपाइँ सम्पन्न भएको हो। रसुवामा २ हजार ७ सय १८ हेक्टर जमिनमा रोपाइँ हुनेमा हालसम्म १ हजार ४९ हेक्टर क्षेत्रफलमा मात्रै रोपाइँ सम्पन्न भएको छ।  रामेछापको  कुल ७ हजार ८ सय ५९ हेक्टर क्षेत्रफलमा धान रोपाइँ हुने जमिन रहेकोमा हालसम्म ८३ प्रतिशत अर्थात् ६ हजार ५ सय २२.९७ प्रतिशत रोपाइँ सम्पन्न भएको मन्त्रालयको तथ्यांक छ।

मकवानपुर जिल्लामा ७ हजार ६७ हेक्टर जमिनमध्ये ५९.३ प्रतिशत अर्थात् ४ हजार १ सय ९३.५  हेक्टर क्षेत्रफलमा रोपाइँ सम्पन्न भएको छ भने २७ हजार २ सय ७ हेक्टर क्षेत्रफलमा रोपाइँ हुने गरेको चितवनमा ८०.३ प्रतिशत अर्थात् २१ हजार ८ सय ५० हेक्टर क्षेत्रफलमा रोपाइँ सम्पन्न भएको हो।  यस्तै, नुवाकोटमा १६ हजार ४ सय ९८ हेक्टर धान खेती हुने जमिनमध्ये १६ हजार २ सय ८९ हेक्टर क्षेत्रफलमा धान रोपाइँ सकिएको छ।

यसैगरी, सिन्धुपाल्चोकमा ८ हजार ७८२ हेक्टरमध्ये ६७.२ प्रतिशत अर्थात् ५ हजार ९ सय १.३ हेक्टर क्षेत्रफलमा रोपाइँ सकिएको मन्त्रालयको तथ्यांक छ भने सिन्धुलीमा ११ हजार ४४५ हेक्टर जमिनमध्ये ६३.७ प्रतिशत अर्थात् ८ हजार ५ सय ६५ हेक्टर क्षेत्रलफलमा रोपाइँ सकिएको प्रदेशको कृषि तथा पशुपन्छी विकास मन्त्रालयको तथ्यांक छ।
१० हजार २ सय १० हेक्टर क्षेत्रफलमा धान रोपाइँ हुने गरेको काभ्रेमा ७६.१४ प्रतिशत अर्थात् ७ हजार ७ सय ७४.२ हेक्टर क्षेत्रफलमा रोपाइँ भएको छ सम्पन्न भएको मन्त्रालयका प्रवक्ता सुजन कडेँलले बताए।