कर्णाली प्रदेश सरकार गठनका लागि आज मुख्यमन्त्रीकाे दाबी पेस हुँदैछ । २१ पुसमा प्रदेश प्रमुख तिलक परियारले संविधानको धारा १६८ को उपधारा २ बमोजिम दुई वा दुईभन्दा बढी दलहरूको समर्थनमा बहुमत जुटाएर मुख्यमन्त्रीकाे दाबी पेस गर्न आह्वान गरेका थिए ।

आज सहमति जुटाएर मुख्यमन्त्रीका लागि दाबी पेस गर्ने तयारी सत्ता गठबन्धनले गरेकाे छ । माओवादी केन्द्रका प्रदेश इञ्चार्ज कालिबहादुर मल्लले बिहान ११ बजे दलहरूबीच छलफल हुने र साँझ पाँच बजेअगावै माओवादी संसदीय दलका नेता राजकुमार शर्माले मुख्यमन्त्रीका लागि दाबी पेस गर्ने बताए ।

गठबन्धनमा रहेका दुई ठूला दल एमाले र माओवादी केन्द्रबीच अझै सहमति जुट्न सकेको छैन । एमालेले आलोपालो सरकार बनाउनुपर्ने अडान लिएको बुझिएको छ ।

माओवादीका शर्मालाई एमालेले समर्थन गरेमात्रै सरकार बनाउने बहुमत पुग्छ । ४० प्रदेशसभा सदस्य रहेकाे कर्णालीमा सरकार गठनका लागि २१ जनाकाे समर्थन चाहिन्छ । माओवादी केन्द्रका १३ र एमालेका १० तथा राप्रपाका एक गरी गठबन्धका पक्षमा २४ सांसद छन् ।

कर्णाली प्रदेशसभामा एक स्वतन्त्रसहित पाँच दलको प्रतिनिधित्व रहेको छ । नेपाली कांग्रेस १४ जना सांसद छन् । यस्तै एकीकृत समाजवादी र राष्ट्रिय प्रजातन्त्र पाटीका एक–एक सांसद छन् । एक जना स्वतन्त्र छन् ।