भक्तपुरमा आफ्नै पत्नीको हत्या गरेको आरोपमा युवक पक्राउ परेका छन्।

पक्राउ पर्नेमा भक्तपुरको चाँगुनारायण नगरपालिका–३, झौखेल पिपलबोट नजिकै डेरा गरी बस्ने सिन्धुपाल्चोक मेलम्ची नगरपालिका वडा नम्बर ८ घर भएका २५ वर्षीय सन्तोष भुजेललाई रहेका छन् । भुजेललाइ श्रीमती हत्याको आरोपमा प्रहरीले पक्राउ गरेको हो।

जिल्ला प्रहरी परिसर भक्तपुरका सूचना अधिकारी प्रहरी नायब उपरीक्षक वसन्त पाठकका अनुसार मादक पदार्थले मातेका सन्तोषले बिहीबार साँझ आफ्नै श्रीमती २१ वर्षीया पवित्रा राईलाई कुटपिट गरेका थिए। कुटपिट पछि गम्भीर घाइते भएकी पवित्रालाई भक्तपुर अस्पताल लगिए पनि उपचारकै क्रममा बिहीबार बेलुकै ७ः१५ बजे उनको मृत्यु भएको डीएसपी पाठकले जानकारी दिए।

पोस्टमार्टमका लागि शव भक्तपुर अस्पतालमै राखिएको प्रहरीले जनाएको छ। घटनामा संलग्न आरोपमा प्रहरीले सन्तोषलाई नियन्त्रणमा लिई थप अनुसन्धान गरिरहेको छ।